Ұлттың басты сипаты оның салт-дәстүрінен бастау алады. Ұрпақтан-ұрпаққа жалғасып келе жатқан игі дәстүріміз – ұлтымыздың айнасы. Дәстүрімізге жай ғана қызығушылық танытпай, оның терең мағынасына мән берген жөн. Бұл орайда “Қазақ аналары – дәстүрге жол” республикалық қоғамдық бірлестігі салт-дәстүрді ұлықтап, саналы ұрпақ тәрбиелеуге өз үлесін қосуда.
“Қазақ аналары – дәстүрге жол” қоғамдық бірлестігі қазақ аналарына отбасы, бала тәрбиесінде тілімізді, ділімізді, ата дінімізді, салт-дәстүрімізді, әдет-ғұрпымыздың озығын насихаттап, тәлім-тәрбиенің өзегі ету мақсатында құрылған. Оның төрайымы – Айнұр Жүгінісова. Қазақ аналары ұлттық құндылықтарды сақтап, жас ұрпақты ата дәстүр негізінде тәрбиелеуді көздеген түрлі іс-шараларға қатысып тұрады. Республикалық қоғамдық бірлестіктің құрамында екі миллионға жуық нәзік жан бар. Облыс орталықтарында, аудандар мен ауылдарды қоса есептегенде 21 филиал жұмыс істейді. Бүгінде бірлестік жұмысы оңтүстік өңірлерде қарқынды дамуда. Ұйым төрайымы Айнұр Жүгінісованың бастамасымен Ресей астанасы – Мәскеуде де филиал ашылған болатын. Алдағы уақытта Қырғызстан, Түркия елдерінде ашу жоспарлануда.
Қызылжар қаласында ашылған қоғамдық бірлестік филиалының құрамындағы аналар ауыз толтырып айтарлықтай жұмыс атқаруда. Егде жаста болсақ та, заман ағымынан қалмауға тырысудамыз. Бүгінгі жастармен иық түйістіре отырып, қоғамдық мүдде үшін барымызды салудамыз. Біз ұлттық дәстүрді насихаттауға ерекше ден қоямыз. Салт-дәстүр – ұлттық тәрбие негізі. Көпті көрген көнекөз қарттардың жастарға айтар ақылы, өнегесі бар. Соны жастарға үлгі етуіміз керек.
Қазір қоғам өзгеруде. Өзгенің қаңсығын таңсық көретін жастар да жоқ емес. Дәстүр мен тілді ұмыту – ең үлкен қателік. Әрине, көпке топырақ шашуға болмайды. Өзінің өткенін білетін, ұлттық құндылығына құрметпен қарайтын саналы ұл-қыздар бар. Оларға айтар алғысымыз шексіз.
“Қазақ аналары – дәстүрге жол” қоғамдық бірлестігінің Солтүстік Қазақстан облыстық филиалына 30-дан астам адам мүше. Оған Алма Махамбетова жетекшілік етеді. Құрылғанына көп уақыт өте қоймаса да, төрайым өңірдің аудандары мен ауылдарында да жұмысты жандандыруда. Бүгінде Әл-Фараби мектеп-лицейі, С.Шаймерденов атындағы қалалық классикалық гимназия, Әлихан Бөкейхан атындағы №25 орта мектеппен тығыз байланыстамыз. Қоғамдық іс-шараларға жиі қатысамыз, мерекелерде ұлттық салт-дәстүрлерге қатысты қойылымдар көрсетіледі. Биыл еліміз үшін сын сағаты туды. Топан сумен алысуда өңір жұртшылығы ауызбіршілік танытып, жұдырықтай жұмылды. Қызылжар елі ырысты ынтымағын танытты. Тасқын сумен күресте біздің ақ жаулықты аналарымыз да қарап қалмады. Қолдан келгенше қаржылай көмек көрсеткенін атап өту артық болмас.
“Жұмыла көтерген жүк жеңіл” дегендей, өңір қарттары бір жағадан бас, бір жеңнен қол шығара отырып, қайырымдылық шараларына белсене қатысты. Қоғамдық ұйым мүшелері әрбір іске бел шеше кіріседі. Өйткені, қоғамға пайдамызды тигізіп, ұрпақ тәрбиелеуге үлес қосу – біздің парызымыз. “Елім маған не береді деп емес, мен еліме не бере аламын?” деген аналарымыз балалар тәрбиесі, әлеуметтік-мәдени дамуға, тұрмыстық салт-дәстүрге баса көңіл бөлуде.
Айтар сөзі, өнегелі ісі бар әжелердің тағылымды тәрбиесін насихаттау керек. Ұлттық тәрбие – ұлт болашағы екенін ескерсек, салт-дәстүрді кеңінен насихаттауға барынша жағдай жасауға тиіспіз. Дәстүр рәсімдік салт қана емес, үлкен мағынасы бар қоғамдық құндылық, ұрпақтан-ұрпаққа қалатын мұра. Ол мұраны жаңғыртып қоғамда ибалы, инабатты қыз, ұлықты, адал ұл тәрбиелеуді басты мақсат еттік. Болашақ – бүгінгі жастардың қолында. Оларға аға буын әрқашан үлгі-өнеге көрсетуі шарт.
Мен “Қазақ аналары – дәстүрге жол” қоғамдық бірлестігінің белсенді мүшесімін. Бала, жастар тәрбиесіне қатысты мәселелерде бірлестік төрайымы Айнұр Жүгінісова, кеңесшісі Зәмзәгүл Мұқановамен ақылдасып отырамыз. Әртүрлі тақырыптарды талдап, өскелең ұрпақты заманауи бағытта қалай тәрбиелеу жолдары қарастырылады. Бірлестік мүшелеріне нұсқау беріліп, пікірлеріміз сарапқа салынады.
Жақында Алматы қаласында “Абысын-ажын” республикалық форумы өтті. Форум аясында еліміздің 9 облысынан қатысқан үміткерлер ұлттық құндылықтарды дәріптеуде өзара бақ сынасты. Түрлі бағытта өнерлерін көрсеткен аналар ерекше дайындықпен барғанын айтып өту қажет. Жеңімпаздар қаржылай сыйлықтармен марапатталды. Осындай жиындарға қатысуға жергілікті билік тарапынан қолдау болса, біз де өз өнерімізді көрсетуге дайын екенімізді айтқым келеді. Келесі жылы аталмыш форум Қызылордада өтеді. Соған қатысуға ниетіміз бар.
Түркістан қаласында “Аялы әже” форумы бастау алып, бұл шара алдағы уақытта басқа қалаларда да өтетіні белгілі болды. Кейін форум Астана мен Көкшетау қалаларында жалғасын тапты. Көкшетау қаласы эстафетаны біздің өңірге табыстады. Біз шараны өз деңгейінде ұйымдастырып, кезекті Қостанайға табыс етуге әзірленудеміз.
1 қазан – Халықаралық қарттар күніне орай қалалық Мәдениет үйінде концерттік бағдарлама ұйымдастырылды. Сол шарада қалалық ардагерлер кеңесінің төрағасы Жангелді Тәжиннің қолынан Алғыс хат алдық. Бұл марапат – біздің еңбегімізге берілген жоғары баға.
Қазір түрлі ағымдар, теріс күштер біздің ұлттық бірегейлігімізге қауіп төндіруде. Сондықтан салтымызды ұмытпай, ұлттық құндылықтарды дәріптеу кезек күттірмейтін мәселе. Ата-бабамыздан мирас болған салт-дәстүрді көзіміздің қарашығындай сақтап, келер ұрпаққа табыстау сіз бен біздің басты парызымыз. Жастарды ұлтты сүюге тәрбиелесек, олар атадан жеткен салтымыз бен дәстүрімізге сатқындық жасамайтын болады.
Ғалия ӨМІРБЕКОВА,
“Қазақ аналары – дәстүрге жол” қоғамдық бірлестігі облыстық филиалы төрайымының кеңесшісі.