Соңғы жылдары өңіріміздегі емдеу мекемелерін білікті мамандармен қамтамасыз етуге, материалдық-техникалық әлеуетін арттыруға айрықша көңіл бөлінуде. Тайынша көпбейінді ауданаралық ауруханасында қолға алынған ілкімді істер соның айқын дәлелі. Қатарға қажетті мамандар қосылып, емдеу ісінде жаңашылдықтар жүзеге асырылуда. Биыл жас мамандардың қатарын толықтырған Гүлнұр Сандыбаева сияқты дәрігерлердің “Дипломмен – ауылға!” бағдарламасы бойынша жұмысқа орналасуы емдеу мекемесінің жұмысын жеңілдете түскені шындық.
Шығыс Қазақстан облысындағы Үржар ауданында дүниеге келген Гүлнұр Сандыбаева – елордадағы медицина университетінің түлегі. Биыл оқуды тамамдаған жас дәрігердің таңдауы Тайынша ауданына түскен. Айтуынша, мұнда жас мамандарға ерекше қолдау көрсетіледі. Сондықтан еңбек әліппесін осы жерде бастауды жөн көріпті.
– Медициналық университеттің түлектерімен кездесуде көптеген емдеу ұйымдарының өкілдерімен әңгімелестім. Өзге денсаулық сақтау мекемелерімен салыстырғанда, мұнда жас мамандарды баспанамен қамтамасыз ету, көтермеақы төлеу қарастырылған екен. Әр маманға бір жарым миллион теңге көлемінде көтермеақы тағайындалады. Бұл біз үшін үлкен көмек. Өзімнің таңдауыма өкінбеймін. Біз қай жерде жұмыс істесек те, тұрғындардың денсаулығына жауаптымыз. Сондықтан тұрғындарға медициналық көмек көрсетуде антымызға адал болуымыз керек, – дей келе Гүлнұр Талғатқызы ұжымның жас мамандарға деген шынайы қамқорлығына риза екенін жеткізді. Аз уақыттың ішінде өзін жақсы қырынан көрсеткен дәрігердің жұмысқа жауапкершілігі зор. Тонның ішкі бауындай тез тіл табысып, қарапайым, елгезек қасиетімен көзге түскен Гүлнұрдың әр күні қарбаласқа толы. Күн сайын 50-60 адамды қабылдайтын терапевт апта сайын ауылдарды аралап, басы ауырып, балтыры сыздаған шалғайдағы науқастарға медициналық көмек көрсетуде.
Жас маманмен аз-кем әңгіме барысында оның бұл мамандыққа деген сүйіспеншілігі зор екенін аңғардым. Ол бұл салаға кездейсоқ келмеді. Атасы Нұрланбек Сандыбаев хирург болса, әкесі Талғат Сандыбаев Шығыс Қазақстан өңіріне белгілі дәрігер. Ақ халатты абзал жандардың ізін жалғаған Гүлнұр да абырой биігінен көрінуді алдына мақсат етіп отыр. Жалпы, биыл Тайынша аудандық ауруханасына Гүлнұр Талғатқызынан басқа тағы үш маман келгенін айтып өткен жөн.
– Бүгінде мемлекет тарапынан денсаулық сақтау саласына жан-жақты қолдау көрсетілуде. Соңғы үш жылда ауданға он бес дәрігер келді. Әлеуметтік қолдаудың арқасында олар тұрғындарды сапалы медициналық көмекпен қамтамасыз етуге өз үлестерін қосуда. Биыл жұмысқа орналасқан жас мамандарға көтермеақы тағайындалып, оларды баспанамен қамтамасыз ету қарастырылды. Жалпы тәжірибе дәрігері, педиатр, хирург сияқты мамандардың ұжымның қатарын толықтырғанына қуанамын. Өзге емдеу мекемелерімен салыстырғанда, екі жылдан бері бізде кадр тапшылығы жоқ. Қазір аудандық ауруханада 68 дәрігер еңбек етеді, – дей келе аурухананың бас дәрігері Анатолий Рафальский мұнда білікті мамандардың жалақысы 200-300 мың теңгені құрайтынын жеткізді. Жалпы, биыл өңірімізге жүзден астам дәрігердің келетіні туралы бұрын да айтылған болатын. Облыстық денсаулық сақтау басқармасының басшысы Тимур Сұлтанғазиев бүгінде олардың тең жартысы емдеу мекемелеріне жұмысқа орналасқанын, қалғаны жыл соңына дейін келетінін жеткізді.
Ақмарал ЕСДӘУЛЕТОВА, “Soltústik Qazaqstan”.
Суретті түсірген Гүл НҰРАЛИНА.
Тайынша ауданы.