Облыстық соттың қылмыстық істер жөніндегі сот алқасы Сергей Емельянов, Данил Орлов және Ирина Скоробогатоваға қатысты апелляциялық шағымды қарай келіп, бір отбасын ойрандаған үш айыпталушының жазасын қатаңдатты.
Еске сала кетейік, 2023 жылы жаңа жыл қарсаңында кәсіпкер Вадим Приходченко мен оның жұбайы Юлия және олардың 17 жастағы ұлы Юрийдің өлі денелері үйлерінен табылған болатын. Көп ұзамай үш адамды азаптап өлтірді деген күдікпен Сергей Емельянов пен Данил Орлов қамауға алынды. Кейін Вадим Приходченконың бизнестегі бәсекелесі Ирина Скоробогатова аталған іске қатысы бар деген сезікпен ұсталды. Оған Қылмыстық кодекстің 28-бабы 4-бөлігі (Басқа адамды азғыру, параға сатып алу, қорқыту жолымен немесе басқа да тәсілмен қылмыстық құқық бұзушылық жасауға көндiру, айдап салу) бойынша айып тағылды.
Аталған іс бір жылға жуық қылмыстық істер жөніндегі ауданаралық сотта қаралып, былтыр қазан айында үш адамға қатысты үкім шығарылды. Сергей Емельянов өмір бойына, Данил Орлов 21 жыл сегіз айға бас бостандығынан айырылды. Ирина Скоробогатова да қылмыстық құқық бұзушылық жасағаны үшін кінәлі деп танылды. Яғни ол қылмыс жасалғаны туралы біле тұра жасырғаны үшін үш жылға бас бостандығынан айыру жазасына кесілген.
Алайда мұндай үкіммен прокурорлар да, жәбірленуші тарап та келіспей, апелляциялық шағым түсірді. Тіпті марқұм кәсіпкердің қызы Татьяна Приходченко видеоүндеу жариялап, ата-анасы мен інісін өлтіргендерге жазаны қатаңдатуды сұраған болатын. 2024 жылдың қараша айында басталған апелляциялық сотта Ирина Скоробогатова өзінің бұл қылмысқа еш қатысы жоқ екенін, бұл отбасымен жақсы қарым-қатынаста болғанын айтып ақталды. Бірінші сатыдағы сот отырысында да осы ұстанымында қалған. Сергей Емельянов та өзінің ешкімді өлтірмегендігін айтып, жалтарған. Қылмыстың барлығын Данил Орловтың басына үйіп-төккен. Ол сол күні Приходченконың үйіне барғанына өкініп, Татьянадан кешірім сұраған. Ал апелляциялық сот отырысында тұтығып сөйлей алмаған Данил Орловтың орнына оның қоғамдық қорғаушысы – анасы сөйледі. Ол бірінші сатыдағы сот отырысында Орловтың өзі айтқандай, Емельяновтан қорыққанын, оның қоқан-лоққы көрсеткенін, қайғылы оқиға болған күні Сергей Емельяновқа ілесіп, Приходченконың үйіне барғанымен, ешкімді өлтірмегенін жеткізген.
Бес айға жалғасқан апелляциялық сот аяқталып, қылмыстық істер жөніндегі сот алқасы Сергей Емельяновқа қатысты үкімді өзгеріссіз қалдырды. Ал Данил Орлов жазасын алғашқыда айтылғандай 21 жыл сегіз ай емес, 23 жыл өтейтін болады. Ирина Скоробогатованың да жазасы қатаңдатылды. Ол 4 жылға бас бостандығынан айырылды.
Динара ТӨЛЕҢГІТОВА,
облыстық соттың баспасөз хатшысы.