Бұлттан шыққан күндей болып …

13 ноября, 2013

Soltüstık Казахстан

Kyzylzhar_akparat@mail.ru

Алма ҚУАНДЫҚҚЫЗЫ,

“Солтүстік Қазақстан”.

Облыс орталығындағы ЕС 164/6 мекемесінде жазасын өтеп жатқан нәзік жандардың саны – 260. Бұл – қаншама қыз-келіншек заңды белден басып, сол үшін тар қапастың арғы жағына тоғытылған деген сөз. Олардың барлығы да біреудің анасы, біреудің бауыры. Туған-туыстарынан қол үзіп, уақытша болса да, колония қабырғасында жазасын өтеп жатқандардың бірі – Диана Нұрпейісова. Ол отбасының тұңғышы. Бала кезінен өнерге жақын болып өскен Диана ән салып, би билеумен шұғылданған. Оның ішінде балеттің қыр-сырын меңгеру үшін төрт жыл бойы мамандардан сабақ алған. Сөйтіп, арманына қанат бітіріп, оқу оқып, еңбек етемін деп жүрген кезде тағдыр оны аяқтан шалып, ақыры жазасын өтеушілер колониясына отырғызылған.

Диана есірткі сатумен айналысқаны үшін алты жылға бас бостандығынан айрылған. Ол кезде бойжеткен Астана қаласында жұмыс істеп, сырттай оқып жүрген. Қолымен істегенін мойнымен көтере білген Диананың аталмыш мекемеге жіберілгеніне жақында екі жыл болады. Тар қапаста отырса да, бір күнін босқа өткізбеуді мақсат еткен ол түрлі үйірмелерге қатысып, білмегенін үйренсе, білгенін ұштай түседі. Ол мекемеде жоспарлы түрде өткізіліп тұратын іс-шараларға қатысады. Жақында ғана өткен “Күзгі бал” кешінде өз өнерін ортаға салып, қолда бар заттардан өзіндік бір киім үлгісін істеп жасаған. Оның үстіне киіп алған көйлегіне қарасаң, айтарлықтай бір шеберлікті байқайсың. Күзгі бақтың түрлі-түсті жапырағынан бастап, жеміс-жидегіне дейін жинап алып, жаңа түрге енгізіп, асыл дүниеге айналдырғаны оның ізденімпаздығын, іскерлігін көрсетеді. Осынша өнерді бір бойына жинай білген Диананың дәл қазір бір ғана арманы бар. Ол – жазасын өтеп, өз ортасына оралу. Жастықтың албырттығымен шалыс басқанына өкінеді. Жас жүрегін сыздататыны да осы.

– Өмірім жаңа басталып келе жатқанда осындай ағаттық жібергенім үлкен қателік болды. Енді мен үшін бұл болашақта сабақ болады. Қыз-келіншектерге жаман жол жақсылыққа әкелмейді дегенді айтқым келеді, – дейді ол.

Ой десе ойы, бой десе бойы бар қазақ қызы сол қателікті істемегенде бүгінде бір мамандық иесі болар ма еді, әлде ана болып бесік тербетіп отырар ма еді, кім білсін? Бірақ қалай болғанда да, оның үміт артып отырған ертеңі бар. Сондықтан да бостандыққа шыққан соң жаңа өмір бастап кетеріне сенімді.

Суретті түсірген Амангелді БЕКМҰРАТОВ.