Soltüstık Казахстан
СҚО Ішкі істер департаментінің қадрлармен жұмыс басқармасының қызметкерлері №6637 әскери бөлімінің сарбаздары арасында кәсіби бағдар беру жұмысын өткізді.
Кездесудің басты мақсаты сарбаздарды полиция қатарына қызмет етуге шақыру және бұл саланың тиімді тұстарымен таныстыру болып табылды. Жиын барысында олардың қала көшелеріндегі қоғамдық тәртіпті сақтауға дағдыланғандары, өзге де мүмкіндіктері айтылды.
Үміткерлер дене шынықтыру нормативтерін тапсырған соң комиссия мүшелері оларды ішкі істер органдарына қабылдау шешімін жариялайды. Егер де жұмысқа орналасушы Отан алдындағы борышын өтеген, жоғары мамандық иегері болса, онда ол бірден офицер қатарына жұмысқа қабылдануы мүмкін. Осы орайда Петропавл қалалық Ішкі істер басқармасының қадрлармен жұмыс бөлімінің инспекторы Жанар Бегалинова ІІМ жоғары оқу орындарына қалайша түсуге болатындығы жайында толық ақпарат берді. Кездесу барысында тәртіп сақшыларына біраз сұрақтар қойылды. Сарбаздардың көбін дене шынықтыру дайындығы, құқық қорғау қызметкерлерінің еңбекақысы мен әлеуметтік қамтамасыз етілу жағы қызықтырды.
№6637 әскери бөлімінің қатардағы жауынгері Дәулет Перманов барша сарбаздар атынан сөз алып, бұл бастаманы толық қолдайтындығын жеткізді. Отан алдындағы әскери борышын өтегеннен кейін ІІМ жоғары оқу орнына түсіп, қызметімді ішкі істер органдары саласында жалғастыру ойымда бар, деді сарбаз.
Ішкі істер органдарында қызмет етемін деушілер Петропавл қаласы, Алматы көшесі, 55-үй мекенжайы бойынша жолыға алады. Сондай-ақ оқу орындарына түсу тәртібі жайында толық мағлұматты Ішкі істер департаментінің ресми сайтының “Кадрлармен жұмыс басқармасы» бөлімінен ала аласыздар.
СҚО ІІД-нің баспасөз қызметі.