Soltüstık Казахстан
Н.Погодин атындағы облыстық орыс драма театрында Сегіз сері атындағы қазақ халық аспаптар оркестрінің “Көктем вальсі” концерті болып өтті.
Бақытжан ЖОЛДАСҚЫЗЫ,
“Солтүстік Қазақстан”.
Көктем тақырыбына арналған концертті Сегіз сері атындағы қазақ халық аспаптар оркестрі А.Хачатурянның “Вальс” шығармасымен ашты. Дирижері, оркестрдің көркемдік жетекшісі – ҚР Мәдениет қайраткері Қайырлы Ғафуров. Концертте қазақ және шетел классик сазгерлерінің шығармалары орындалды. Әсет Бейсеуовтің “Сырласу вальсі” мен Латиф Хамидидің “Қазақ вальсі” әндерін филармонияның күміскөмей әншілерінің бірі – Нұрсұлу Ахметжанова шырқады. Өңірімізде дәстүрлі ән өнерін дамытушылардың алды болып жүрген Жанат Айтбаев оркестрдің сүйемелдеуімен Естайдың “Құсни-Қорлан” әнін тамылжыта орындады. Әншілер Дәмеш Құрманкина, Жанат Алпысбаева, Радик Синтиков, Бахыт Ілиясов пен Лилия Петрова да жұртты ұйыта білді. Қазақ ұлттық ән өнерінің жауһарына айналып үлгерген Абай, Жаяу Мұса, Нұрғиса Тілендиев сынды сазгерлердің шығармаларын тамылжыта орындаған оркестрге де көрермендер ризашылықпен қол соқты.
Халық тағы бір тосын сыйды тосырқамай қарсы алды. Өнер колледжінің түлегі, Тойкен Күдерованың дарынды шәкірттерінің бірі, домбырашы, қазіргі таңда Құрманғазы атындағы Ұлттық консерваторияның студенті Әсет Әбдірахмановты әнсүйер қауым әдеттегідей домбырасымен қарсы алған жоқ. Бұл жолы ол кезінде өзі өнер көрсеткен оркестрдің дирижері ретінде өнер көрсетті. Оның дирижерлік етуімен оркестр Е.Үсеновтың, Ш.Гуноның, Ж. Бизенің, Н.Тілендиевтің, Б.Байқадамовтың, Е.Доганың, А.Зацепиннің туындыларын орындады. Сондай-ақ бұл концертте астаналық Дәурен Ғылымов та дирижерлік етті. Ол скрипкашы Виктория Иванищевамен бірге П.Чайковскийдің “Русский танец” шығармасын орындады. Қазақ халық аспаптар оркестрінің жекелеген скрипкашымен қосылып өнер көрсетуі сирек құбылыс болып саналады. Бірақ бірнеше түрлі үннің үзілмей, өзара үйлесімді жарасуы ұлттық аспаптардың өміршеңдігін тағы да таныта түскендей болды. Кеш соңы А.Зацепиннің “Көктем вальсі” әнімен аяқталды.
СУРЕТТЕ: дирижер Қ.Ғафуровпен әнші Н.Ахметжанова.
Суретті түсірген Талғат ТӘНІБАЕВ.