Soltüstık Казахстан
Ауданның сан алуан тіршілігі жергілікті мәслихат жұмысымен тікелей байланысты десек, артық айтқандық емес. Тайынша ауданының көкейкесті мәселесін шешуге қаржы бөлу, билік пен халық арасында «алтын көпір» қызметін адал атқару, оң шешім қабылдау депутаттар белсенділігіне, сондай-ақ мәслихаттың белсенді жұмысына байланысты. Осы жайында аудандық мәслихат хатшысы Қайрат Шәріповпен әңгімелескен едік.
– Қайрат Кеңесұлы, өткен жылдың жұмысын еңсерген уақытта жылдық жұмыс нәтижесін айту орынды. Аудандық мәслихат хатшысы ретінде жыл ішіндегі жұмысқа тоқталсаңыз?
– Тайынша аудандық мәслихаттың 2013 жылға арналған жоспарлы шаралары толықтай атқарылды деуге болады. Мәслихат қызметінің негізгі нысаны сессия болса, өткен жылда 22 сессия өткізілді. Онда 80 мәселе қаралып, қабылданған 15 шешім мемлекеттік тіркеуден өткізіліп, бұқаралық ақпарат құралдарында ресми жарияланды.
– Тарихқа шолу жасап, Тайынша аудандық мәслихаттың құрылуы жайлы айта кетсеңіз.
– 1994 жылғы 7 наурыз күні бірінші шақырылым депутаттарын сайлау науқаны өткізілген болатын. Сайланған депутаттық корпус құрамына аудан кәсіпкерлері, ірі кәсіпорын жетекшілері, көлік және байланыс, ауыл шаруашылығы, денсаулық сақтау, білім және мәдениет саласының қызметкерлері енді. Олардың қатарында Төлеген Қоныспаев, Мәулітбек Есмұқанов, Орынбай Әлжанов, Павел Рафальский, Орал Алдабергенов, Анатолий Рафальский болды. Қазақстан Республикасы Президентінің “Көкшетау облысының әкімшілік-аумақтық құрылысындағы өзгертулер туралы” Жарлығын жүзеге асыру шаралары туралы” №698 қаулысының 1-тармағы 6) тармақшасына сәйкес таратылған Чкалов және Келлер аудандарының аумағы Тайынша ауданының шекарасына қосылды. Сәйкесінше, Чкалов, Келлер және Красноармеец аудандық мәслихаттардың депутаттары Тайынша аудандық мәслихат депутаттары атанып, өз мақсат-мүдделерін сақтап қалды. Осылайша 1997 жылғы 18 шілдедегі бірінші шақырылымның XV сессиясының шешіміне сәйкес Тайынша аудандық мәслихат құрылды. Осы 20 жылдық уақыт аралығында мәслихат хатшысы лауазымын атқарған азаматтар қатарында С.Алпысбаев, В.Бартусевич, Т.Тоқтыбаев, Ж.Ғабдуллин, С.Звольский, Т.Сәрсембаев, Ю.Красноголовый, Ю.Машталяр, Б.Абдрахманов, Г.Полякова, В.Червинский, О.Жакупова, С.Кочелабова, М.Ульсаитов, К.Токужинов, А.Дүйсенова, Қ.Ысқақов, Н.Трифонов, М.Нұрсеитов, С.Балтабаев, В.Масловский сынды депутаттар түрлі жылдары халық игілігі үшін қыруар шаруа атқарды.
– Жергілікті өзін-өзі басқару туралы заң қаншалықты орындалуда?
– Ел Президентінің Қазақстан халқына арнаған “Қазақстан – 2050” Стратегиясы – қалыптасқан мемлекеттің жаңа саяси бағыты” Жолдауында: “Мен Жергілікті өзін-өзі басқаруды дамыту тұжырымдамасын бекіттім. Ол ауылдық, селолық деңгейде басқару сапасын арттыруға мүмкіндік жасайды және азаматтардың жергілікті маңызы бар мәселелерге қатысуын кеңейтеді. Азаматтардың жергілікті жерлердегі өзекті мәселелерді шешуге, жергілікті билік органдарының жұмысын бақылауға белсене араласатын уақыт туды”, – деп атап өткен болатын. Еліміздегі мемлекеттік құрылымды жетілдіру бағытында біршама заңдарға өзгерістер мен толықтырулар енгізіліп, өкілетті органдар – мәслихаттардың рөлі күшейтілді. Бұл бізге үлкен міндет жүктейді. Еліміздегі саяси жүйе мен мемлекеттік құрылымды одан әрі жетілдіру, демократиялық процестерді дамыту бағытында қолға алынып жатқан жұмыстардың бірі – жергілікті жерлердегі өзін-өзі басқаруды жүзеге асыру. Оны әрі қарай дамыту қала және ауыл әкімдерінің, ауыл тұрғындарының және мәслихат депутаттарының басты міндеті деп білемін.
– Былтырғы жылы еліміз бойынша 7 тамыз күні әкімдер сайлауы өткізілген болатын. Алғаш рет өткізілген ауыл әкімдерін сайлау халық қалаулыларына үлкен жауапкершілік артқандығы сөзсіз. Жалпы сайлау қандай деңгейде ұйымдастырылды?
– Тайынша қаласы және 18 ауылдық округ әкіміне, әрқайсысына балама 3 кандидаттан барлығы 57 кандидат тіркелген болатын. Мәслихат депутаттарына барлық балама кандидаттардың үгіт-насихат материалдары таратылып, халық бұқаралық ақпарат құралдары арқылы кандидаттармен танысты. Кейін мәслихат депутаттары барлық балама кандидаттармен кездесу өткізіп, бағдарламаларын тыңдады, сұрақтарын қойды. 7 тамыз күні сағат 10.00-де аудандық Мәдениет үйінде аудандық мәслихаттың отырысы болып, қала және ауылдық округ әкімдерінің сайлауы өткізілді. Сайланған әкімдер тіркеуден өткізілгеннен кейін сайлау қорытындыларының нәтижелері жергілікті бұқаралық ақпарат құралдарында жарияланды. Алғаш рет өткізіліп отырғандығына қарамастан, ауылдық округ әкімдерін сайлау науқаны жоғары деңгейде өтті.
– Ауданда атқарылып жатқан жұмыс аз емес. Оған депутаттардың бақылауы қандай?
– Аудан бюджеттің қаржысына атқарылып жатқан жұмыс көпшіліктің бақылауында болуы керек. Мәслихат депутаттары тұрғындардың өтініш-талаптары бойынша жұмыс істейді. Халық қалаулылары “Қолжетімді тұрғын үй – 2020” және басқа мемлекеттік бағдарламалар шеңберінде салынып жатқан нысандардың сапалы да мерзімінде бітуіне партиялық бақылауды “Нұр Отан” партиясының Тайынша аудандық филиалымен бірлесе отырып жүзеге асыруда. Депутаттар тарапынан халыққа қызмет көрсету және денсаулық сақтау орындары, әлеуметтік салалар жұмыстарының тиісті деңгейде болуы үнемі қадағаланады.
– Тайынша қаласының болашағы жайлы не айтасыз?
– Бала кезімізде қаламыздың суретін салғанда зәулім де әсем ғимараттарды, кең көшелерде қозғалып бара жатқан үлкен автобустарды салатынбыз. Қазіргі балалардың Тайынша қаласының болашағы жайлы салған суреттері тіптен де керемет. Шынымен де, Тайынша қаласының ой-қиялдағыдай керемет қала болатынына сенемін, өйткені оған барлық мүмкіндік бар. Осы бағытта мәслихат депутаттары өз жұмысын қолданыстағы заңдылықтарға сай өңірімізді одан әрі жетілдіре түсу мақсатында ізденіспен жұмыс атқарары сөзсіз. Басты мақсат халыққа қалтқысыз қызмет ету болса, билік пен халық мемлекет жөніндегі жауапкершілігін неғұрлым тең бөліссе, атқарылатын жұмыс соғұрлым нәтижелі болады деп ойлаймын.
– Әңгімеңізге рахмет!
Әңгімелескен
Гүл НҰРАЛИНА,
журналист.
Тайынша қаласы.