Soltüstık Казахстан
Мектеп табалдырығын аттағаннан сырлы дүниеге жетектеп, баланың зердесін ашушы алғашқы ұстаз. Солардың бірі – Бақытжан Мұханбеталина.
Ол 1978 жылы Щучинск индустриялық-педагогикалық техникумын бітіріп, ұстаздық жолын Уәлиханов ауданындағы Еңбекшіл мектебінен бастаған. 1990 жылы Көкшетау педагогикалық институтын бітірген. 1993 жылдан бері – Сырымбет орта мектебінің бастауыш сынып мұғалімі.
Көп жылғы ұстаздық әр минутын, әр сағатын жас ұрпаққа сапалы білім, саналы тәрбие беру жолына арнап келеді. Бүгінде – мектептегі ұлағатты ұстаздар қатарында жастарға үлгі-өнеге көрсете білетін, педагогикалық іс-тәжірибесін өз әріптестерімен бөлісіп жүрген, өз мамандығын шын мәнінде жетік меңгерген, әр баланың жеке тұлға болып қалыптасуына өз үлесін қосып келе жатқан ұлағатты ұстаз. Мұғалімнің сабақ үстіндегі негізгі жетістігі оқушылардың өз бетімен жұмыс істеуіне, ойын ашық жеткізе білуге, өз елінің тарихын, салт-дәстүрін, әдет-ғұрпын білуге үйретумен қатар, көркем де әдемі жазуды, жалпы оқытудың бірыңғай талаптарын орындауды үнемі басшылыққа алады. Әр сабағын заман талабына сай, уақыт ағымына қарай күнделікті ақпараттық технологияларды қолданып, интерактивті тақтаны пайдаланып, түрлендіріп өткізу арқылы шәкірттері мектеп бойынша сапа көрсеткіші жоғары сыныптар қатарында үнемі бой көрсетіп келеді. Алдынан білім алып шыққан әрбір оқушысы талантты оқушы ретінде аудан, облыс, тіпті, республика көлемінде танылып жүр.
Сондай-ақ ата-аналардың ардақтысына айналған абзал ұстаз – мектебімізде тұңғыш ашылған қазақ сыныбының тізгінін ұстап, ел игілігі жолында атқарылып жатқан шаралардың әрі қарай жалғасын тауып кетуіне жол ашып, тіл үшін ашық күреске шыққандардың бірі.
Иә, отбасында екі ұл, бір қыз тәрбиелеп өсіріп, Мәдина, Алуа, Кәмила, Дәулет, Әмина атты немерелері «әже» дейтін, Серік ағамыздай абзал азаматқа аяулы жар бола білген, білім саласында жеткен жетістіктеріне көңіл тоярлық қарапайым да нәзік жан – әріптестеріне үлгі-өнеге.
Жанат ШЫҢҒОЖИН,
Сырымбет орта мектебі директорының
оқу-тәрбие жұмысы жөніндегі орынбасары.
Айыртау ауданы.