Soltüstık Казахстан
“Салтанат” бөбекжай-балабақшасында Халықаралық әйелдер күніне орай “Аналардың көңілі көктемдей жайнап, гүл ашсын” атты мерекелік іс-шара ұйымдастырылды.
Ертеңгілікті балабақша меңгерушісі Айгүл Нәсілова ашты. Ол мерекеге келген аналар мен әжелерге шуақты, жылы тілектер айтып, мерекемен құттықтады.
6-топтың тәрбиешілері Р.Әбдірахманова және Р. Хамзина бастаған бүлдіршіндер тобы өз өнерлерін көрсетіп, ата-аналарды қуанышқа бөледі. “Қариясы бар үйдің, қазынасы бар” демекші, әжелердің құрметіне бүлдіршіндеріміз “Ақ әжем” әнін орындады. “Анашым”, “Аман болшы, анашым”, “Көктем” әндері айтылды (әуен жетекшісі – Г.Кеженова). “Үш тіл – тұғырың” екені де назардан тыс қалмай, қазақ, орыс және ағылшын тілдерінде тақпақтар оқылды. А.Абдрахиева – сиқыршы, А.Жақыпова – Көктем аруы, Р.Хамзина тәтелеріміз Шуақты Күн рольдерін дәл сомдап, мерекенің сәнін келтірді.
Дарынды кішкентай бөбектеріміз қазағымыздың қайта оралған “Қара жорға” биін билеп, өнерлерімен тәнті етті. Сондай-ақ, “Қарлығаш”, “Шабандоз” билерімен аналарды қуантты (хореограф – Е.Мұстафина).
Тәрбиешінің көмекшісі Р.Кәкімова “Үстел әзірлеу”, “Жылы сөз” ойындарын жүргізді. Балалар аналарын шақырып, ойын-жарысқа қатыстырды. Бәрінен де барша ананың жан жүрегін дір еткізген “Жылы сөз” ойыны бізге қатты ұнады. Аналардың өз балақайларына бар мейірімімен, жүрегімен айтылған, еркелеткен сөздері барша көрермендерді зор ықыласқа бөледі. Ертеңгілік соңында балабақшаның әдіскері Г.Кирибаева сөз алып, шараны қорытындылады. Балдырғандарымыздың өсіп-дамуына, тіл білу, ән мен би, өлең айту өнерлеріне, спорт түрлеріне баулып, болашақ өнерпаз өрендер етіп тәрбиелеп отырған “Салтанат” бөбекжай-балабақшасының меңгерушісіне, тәрбиешілеріне ақ жаулықты әжелер мен аналар алғысы мен ілтипатын білдіріп, “Аналар мейрамы деп осыны айт!” десіп ризашылықпен тарасты.
6-топтың ата-аналар комитеті.
Петропавл қаласы.