Soltüstık Казахстан
Қарағанды қаласында жасөспірімдер арасында еркін күрестен ел біріншілігі өтті.
Аталмыш сайыста солтүстікқазақстандық балуандар үш қола медальға қол жеткізді. Өз салмақ дәрежелерінде Владислав Корягин (84 кг.), Марина Зуева (51 кг.) және Айша Вольшан (55 кг.) сәтті өнер көрсетті.
***
Шымкентте жасөспірімдер мен жеткіншектер арасында грек-рим күресінен ел біріншілігі өз мәресіне жетті.
Бәсекелі додада Айдос Сұлтанғали (55 кг.) алтыннан алқа тағынса, ал Азамат Бисенғалиев қола медаль иеленді.
Жүлделі орындардан көрінген спортшылар – облыстық спортқа дарынды балаларға мамандандырылған мектеп-интернатының тәрбиеленушілері.
***
Жерлес спортшы Данияр Қаппасов Астана қаласында өткен “Кекушинкай каратэден ТМД кубогы” халықаралық турнирінен күміс медальмен оралды. Ол 60 кг. салмақ дәрежесінде бағын сынаған болатын.
Тағы екі жерлес каратэші “Оқушылар сарайының кубогы” атты шинкиокушинкай сайысынан қанжығаларын майлап қайтты. Атап айтқанда, алты жасар Әмірхан Қасенов жеңімпаз атанса, 10-11 жас тобында сынға түскен Михаил Шальковский қола медальді еншіледі.
***
Атырауда тай боксынан ел біріншілігі өтті.
Өз салмақ дәрежелерінде Нұржамал Қаменова (54 кг.) және Салтанат Жұмабаева (60 кг.) жеңімпаз атанды. 63,5 және 81 кг. салмақ дәрежесінде Бахытжан Бакрамбеков пен Илья Кириенко үшінші болса, Иван Ван-Хон-Тун мен Максим Штром 91 және + 91 кг. салмақ дәрежесінде екінші орынға ие болды.
***
14-15 жастағы кадеттер Қостанай қаласында кикбоксингтен өткен ел біріншілігінде бақ пен баптарын сынады.
Жанат Тұргелдинов (54 кг.) біріншіліктің жеңімпазы атанса, күміс медальге Олжас Шандаков (75 кг.), Александр Зацепин (48 кг.), Болат Жасұзақ (57 кг.), Дарина Білденова (60 кг.) қол жеткізді. Ал Анастасия Любец (60 кг.) пен Вадим Чебатарев (51 кг.) қола медаль еншіледі.
***
Жуырда Щучье қаласында қысқы президенттік көпсайыстан Қазақстан біріншілігі аяқталды. Өңір құрамасының негізін Петропавл қаласының, Тайынша және М.Жұмабаев аудандарының спортшылары құрады.
Күміс медальді иеленгендердің қатарында Юлия Пропустина, Виолетта Поплавская және Юлия Мисетина болса, Виктор Линкевич, Василий Подмогильный және Артем Островский қола медаль жеңіп алды.
Бәсі биік жарыста өз жас топтары мен абсолютті жастар категориясында жеңістің биік тұғырына көтерілген Виктор Линкевич, Александр Науман, Андрей Крайс, Юлия Мисетина, Юлия Швыдкая, Марина Вострикова, Артур Сапаев және Алена Костюченко әлем біріншілігіне қатысатын ел құрамасының сапына алынды.
Сондай-ақ Андрей Крайс пен Виктор Линкевич спорт шебері нормативін орындады.
***
Петропавлдық гимнасшы Олеся Колышева ел құрамасының сапында Малайзияда өткен Азия біріншілігінде өнер көрсетті.
Әділқазылар алқасының шешімімен шоқпармен топтық жаттығуларында сайысқан ел құрама командасы бірінші орынды иеленді.
Ал жалпыкомандалық есепте қазақстандық қыздар үшінші орынға тұрақтады.
***
Біріккен Араб әмірліктерінің Дубай және Шардж қалаларында мүгедек спортшылар арасында жеңіл атлетикадан халықаралық рейтингтік сайыстар өтті. Оған өзге 22 шетелдің спортшыларымен қатар 32 қазақстандық мүмкіндігі шектеулі спортшылар қатысты. Байрақты додада солтүстікқазақстандық жеңілатлетші Сергей Харламов өңір намысын қорғады.
27-28 ақпан күндері Дубай қаласында Сергей ұзындыққа секіру сайысында 4,73 см. көрсеткішімен қола медальге қол жеткізді. Бір атап өтерлігі ол Лондондағы Паралимпиада ойындарында 4,68 см. нәтижесін көрсеткен болатын. 100 метр қашықтыққа жүгіруде төртінші болса, 200 метрде үздік үштікті қорытындылады.
Ал 27-28 ақпан күндері Шарж қаласында өткен дәл осындай сайыстарда Сергей ұзындыққа секіруде үшінші, ал 100 және 200 метр қашықтыққа жүгіру жарысында күміс медальге ие болды.
***
Қарағанды қаласында құлағы нашар еститін мүгедек спортшылар арасында жеңіл атлетикадан ел біріншілігі аяқталды. Оған 8 құрама команда, 80-ге жуық спортшы қатысты.
Біріншіліктің қорытындысы бойынша жалпыкомандалық бірінші орынды Алматы қаласының құрамасы жеңіп алды. Ал екінші және үшінші орындарды Қарағанды мен Ақтөбе қаласының спортшылары еншіледі. Сайыста өңір намысын қорғаған солтүстікқазақстандықтар төртінші болды.
Нақтырақ айтқанда, жерлес құраманың қоржынында екі алтын, екі күміс және бір қола медаль бар. Александр Соловьев 60 және 200 метр қашықтыққа жүгіруден алда болды. Андрей Радченко ұзындыққа секіруде – күміс, ал үш қарғып секіруде қола медаль иеленді. 4х200 метрге жүгіру эстафетасында Александр Соловьев, Денис Кожукалов, Вадим Левун және Дмитрий Лактионовтан құралған ерлер командасы екінші болды.
***
Қарағандыда жеңіл атлетикадан спортшылардың басын қосқан ел чемпионаты біздің өңір өкілдеріне олжалы болды. Аталмыш додада өңір намысын қорғаған 6 спортшы 4 медаль иеленді.
Сайыста жеңілатлетші Светлана Загородневаға 60 метрге кедергілермен жүгіруде – күміс, ал 400 метрге жүгіруде қола медаль бұйырды. Дмитрий Матвеев үш қарғып секіруде – екінші, ал тағы бір жерлесіміз Александр Викторенко 60 метрге жүгіруде жеңімпаз атанды.
***
Павлодар қаласында шаңғы жарысынан ел біріншілігі өтті. Онда нәтижелі өнер көрсеткен солтүстікқазақстандық шаңғышы Анастасия Хмельницкая бір күміс пен екі қола медаль олжалады.
Сондай-ақ Анастасия 1100 метр қашықтық спринтте – екінші, ал 3 шақырымға конькимен және классикалық әдіспен жүгіруде үшінші болды.
Облыстық Дене шынықтыру және спорт басқармасының баспасөз қызметі.