Soltüstık Казахстан
Гүлнәр АҒАЛЕЕВА,
Петропавл қаласындағы
№7 орта мектептің мұғалімі.
Қазақстан экономикасының бәсекеге қабілеттілігін арттырудағы негізгі факторлардың бірі – білім. Білім беру ісі біздің мемлекетімізде басты басымдыққа ие болып, дамуымыздың шешуші факторына айналып отыр.
Сондықтан Елбасымыздың білім беру жүйесі қызметкерлерінің алдына қойып отырған міндеттері Жолдауда тағы бір мәрте нақтыланды.
Маңызды құжаттағы мақсат-міндеттер біздің білім ордасының ұстаздар қауымына да тың серпіліс әкелді. Әріптестерім Елбасының білім беру жүйесіне заманауи оқу бағдарламаларын енгізу, ұстаздық біліктілік сапасын арттыру, стипендия мөлшерін көбейту сияқты маңызды бастамаларын толық қуаттайды.
Биылғы Жолдаудың басты жаңалығы – “Мәңгілік Ел” ұлттық идеясы. Мәңгілік ел идеясын іске асыруда білім мекемелерінің маңызы зор, мұғалімдер қауымына жүктелген жауапкершілік жоғары. Елбасы заманауи бағдарламалар мен оқыту әдістемелері елімізде аса қажет екеніне тоқталды. Әсіресе, жалпы білім беретін мектептерді Назарбаев Зияткерлік мектептеріндегі оқыту деңгейіне жеткізу керек деген ойы көңіліміздегі үміт отын ұшқындата түсті. Яғни, Назарбаев Зияткерлік мектептерінде жинақталған озық тәжірибені еліміздің өзге мектептеріне тарату міндеті қойылды. Демек, білім ошақтарының материалдық-техникалық жағдайы одан әрі жақсара түспек. Олай болса, білім сапасы да жоғарылайды деген сөз.
Педагог мәртебесін көтеру бағытында біздің елімізде ірі қадамдар жасалуда. Мәселен, педагогтер даярлайтын оқу орындарына талап күшейтілді. “Болашақ” халықаралық бағдарламасы аясында жаңа форматқа жауап беретін педагог кадрларды даярлау және олардың біліктілігін көтеру мәселесі қолға алынды. Мұғалімдердің еңбекақысы тұрақты түрде өсуде. Осының бәрі мұғалім мәртебесін көтеруге қызмет етіп, алдымыздан талантты жастарды көбірек ұшыруға жол ашады деп ойлаймын.