Soltüstık Казахстан
Облыстық Бейнелеу өнері мұражайында көрме ұйымдастырылды. “Менің Қазақстаным” атты байқаудың мақсаты – балалардың шығармашылық қабілетін дамыту және жас қаламгерлердің үздік жұмыстарын көрермен назарына ұсыну.
Алма ҚУАНДЫҚҚЫЗЫ,
“Солтүстік Қазақстан”.
Осыдан екі ай бұрын бастау алған аталмыш іс-шара өз мәресіне жетіп, көрмеде балалар суретінің қорытындысы жария етілді. Байқауды ұйымдастырушылар – аталмыш мұражай қызметкерлері, “РекламаСервис” ЖШС, Петропавл қалалық Білім бөлімі және Көркемөнер лицейі. Байқауға Жамбыл, Уәлиханов, Қызылжар аудандарынан және Петропавл, Мамлютка қалаларынан 5-21 жас аралығындағы 109 оқушы қатысқан.
Бағын сынауға бел буған үміткерлер жас ерекшелігіне қарай бес топқа бөлінген. Байқау “Астана – менің жүрегімде”, “Менің көне қалам, сен жас көрінесің” (Петропавл қаласының тарихы, мәдениеті, сәулеті), “Қазақ халқының салт-дәстүрлері”, “Қазақстан халқының рухани бірлігі”, “Менің елімнің мерекелері” деген тақырыпты қамтыған.
Үміткерлер ермексаз, гуашь, батик, акварель, қарындаш және аралас техниканы пайдалана отыра, өз өнерлерін ортаға салған.
Әр тақырып бойынша бағын сынап, жүзден жүйрік шыққан жеңімпаздар мен олардың ұстаздары анықталып, дипломдармен және сыйлықтармен марапатталды. Сондай-ақ қатысушылардың барлығына сертификат табыс етілді. Бірінші орынды жас суретшілер арасында Қызылжар ауданындағы Бескөл ауылы “Мерей” өнер мектебінің оқушысы Аида Рахимжанова жеңіп алды.
– Мен көне қала туралы тақырыпты таңдадым. Суретті екі апта бойы салдым. Өзім алты жасымнан бері суретпен айналысып келемін. Маған ескі ғимараттарды қағаз бетіне түсіру өте ұнайды. Олардың өз сыры мен әдемілігі бар. Мені қызықтыратыны да осы. Алдағы уақытта осындай байқаулар жалғасын тауып тұрады деп үміттенеміз, – дейді ол.
Жиналған қауымды келе жатқан Наурыз мерекесімен құттықтаған ұйымдастырушылар көрме соңында балаларға мерекелік дастарқан әзірледі.
Суретті түсірген
Амангелді БЕКМҰРАТОВ.