Soltüstık Казахстан
“Әл-Фараби” мектеп-лицейінде Қазақстан Республикасының Президенті Нұрсұлтан Назарбаевтың “Қазақстан – 2050: бір мақсат, бір мүдде, бір болашақ” Жолдауына орай “Жас ұлан” балалар қоғамдық ұйымының ұйымдастыруымен Петропавл қаласындағы қазақ мектептері жасұландарының қатысуымен “Мәңгілік Ел идеясын жүзеге асыру – баршаға ортақ міндет” тақырыбында “дөңгелек үстел” өтті.
Зәуреш ШАКЕНОВА,
“Әл-Фараби” мектеп-лицейі директорының тәрбие жөніндегі орынбасары.
Шара Елбасының үстіміздегі жылдың 17 қаңтарындағы Қазақстан халқына жолдаған Жолдауында айтылған “Мәңгілік Ел” ұлттық идеясын жүзеге асыруға, насихаттауға жастардың көзқарасы жөнінде ой бөлісу, пікір алмасу түрінде өтті. Алдымен “Әл-Фараби” мектеп-лицейінің жасұландары Әйгерім Шакенова мен Ұлан Кушумбаев Елбасы Жолдауының негізгі басымдықтарына шолу жасады.
Жасұландардың “Қазақ Елінің Ұлттық Идеясы – Мәңгілік Ел!” жобасын Әйгерім Жазитова, Жәдігер Жамшит жұртшылықтың назарына ұсынды. Жоба үш негізге – көне түрік ескерткіштері, Әл-Фарабидің “Қайырымды қала тұрғындарының көзқарастары туралы” және Жүсіп Баласағұнның “Құтты білік” шығармасына сүйене отырылып, әр шығармада Мәңгілік Ел туралы айтылған ойлар қамтылған.
Соларды саралай келе, жоба қорғаушылары “Мәңгілік Ел” идеясын жүзеге асыру және насихаттау үшін өз ұсыныстарын білдірді:
1. Туған тіліміздің “Мәңгілік тілге” айналуына бар үлесімізді қосамыз.
2. Рухани құндылығымыз бай болуы үшін әдеби шығармаларды оқимыз.
3. Өзіміздің салт-дәстүрлерімізді құрметтеп, сақтауға өз күш-жігерімізді жұмсаймыз.
4. Отбасы құндылықтарын насихаттаймыз, жүзеге асырамыз.
Жобада Мәңгілік Елдің түп негізі біздің бабаларымыздың еңбектерінде айтылғандығын дәлелдей келе, “дөңгелек үстелге” қатысушылар да өз ой-пікірлерін білдіріп, оқушылар нені “құндылық” деп бағалайтындықтары туралы ой бөлісті. Еліміздің “Қазақ елі” атануы жастарымыздың қолында екендігі жайлы ой түйілді. “Дөңгелек үстел” өте мазмұнды, тартымды өтті.
Петропавл қаласы.