Soltüstık Казахстан
Кеше облыстық тарихи-өлкетану мұражайында Швецияның Қазақстандағы Төтенше және өкілетті елшісі Христиан Камилл бастаған бір топ меймандар зиялы қауым өкілдерімен кездесу өткізді.
Шара барысында құрметті қонақтар кездесудің мақсаты екі ел арасындағы ынтымақтастықты нығайту екенін тілге тиек етті. Сонымен қатар, жаңа жобаның тұсауы кесіліп, жиналғандар назарына жаңадан жарық көрген энциклопедияның І томы ұсынылды. Елші энциклопедияның мазмұнына тоқталып өтті. Барлығы 8 томнан тұратын еңбек ағылшын тілінде жазылған. Кітап өсімдіктер мен жануарларды жүйелеудің алғаш негізін салған швед ғалымы Карл Линнейдің (1707-1778) еңбегі бойынша құрастырылған. Табиғат зерттеуші К.Линней өзіне дейінгі ғалымдардың барлығынан да өзгеше, жануарлар мен өсімдіктердің ерекше жүйесін ұсынып, түрлердің шығу тегін анықтауға және олардың дұрыс дамуына жол ашқан. Сондықтан да тірі табиғатты жүйелеуде ғалымның сіңірген еңбегі зор. Ғалымның шәкірттері көптеген елдерге саяхат жасап, табиғатты зерттеу жұмыстарына көмектескен. Солардың бірі – Петр Иоганн Фальк кезінде Қазақстанның солтүстігінде және шығысында болған. Меймандар осы жайында да әңгімелеп, қойылған барлық сұрақтарға жауап берді.
Кездесу соңында мұражай директоры Гүлнәр Мұқышева меймандарға ризашылық білдірді.
Алма ҚУАНДЫҚҚЫЗЫ,
“Солтүстік Қазақстан”.