Soltüstık Казахстан
Ата-бабаларымыздан сақталып келе жатқан дәстүріміздің бірі – қонақжайлылық Қызылжар өңірінің халқына да тән. Мұны күнделікті демалып, ауқаттануға барған мекемелердің жанға жайлылығы мен даяшылардың қызмет көрсету сапасына қарап та аңғаруға болады. Бұрнағы күні өзінің қонақжайлылығымен тәнті етіп жүрген жергілікті мекемелердің үздігін анықтау мақсатында ұйымдастырылған “Қонақжай Петропавл” байқауы қорытындыланып, жеңімпаздар марапатталды.
Облыс орталығындағы “Moulin rouge” мейрамханасында өткен салтанатты шарада облыстық кәсiпкерлiк және туризм басқармасының басшысы Құралай Жарова 2018 жылы өңірімізде “Қазақстан мен Ресейдегі туризмді дамытудағы жаңа көзқарастар мен тенденциялар” тақырыбында өтетін өңіраралық ынтымақтастық форумының маңыздылығына тоқталды. Аса зор жауапкершілікті талап ететін форум облысымыздағы туризм мен кәсіпкерліктің дамуына зор ықпал ететіні сөзсіз.
Байқауға қатысқан қызмет көрсету орындары 20 аталым бойынша бақтарын сынады. Дауыс беру қорытындысына сәйкес “Green Park” отбасылық парк-отелі – үздік демалыс орны, “Скиф” – үздік қонақүй, “Одри” үздік сұлулық салоны, “Fitness & Spa Скиф” үздік фитнес-клубы деп танылды. Күніне 500-ден астам адам жаттығатын фитнес-клубта білікті, сертификаттары бар жаттықтырушылар жұмыс істейді. Әрі спорттың түр-түрі қамтылып, келушілерге толық жағдай жасалған. Сондай-ақ, өңіріміздің үздік қымыз өндірушілері қатысқан “Қымыз-Fest” – жыл мерекесі, жастар арасында аса танымал “Хан ауылы” үздік караоке атанды. Сонымен қатар қызмет көрсетуі және ішкі безендірілуі бағаланған байқауда банкет залы, балаларға арналған дәмхана, асхана, кинотеатр, түнгі клуб және басқа аталымдар бойынша үздіктер марапатталды. Облыстық рестораторлар мен отельерлер қауымдастығының төрағасы Сайран Хамзин еліміздегі туризм саласының дамуына қосқан үлесі үшін “Атамекен” Ұлттық кәсіпкерлер палатасының Алғыс хатына ие болды.
Орынбасар ТӨЛЕПБЕРГЕНҚЫЗЫ,
“Солтүстік Қазақстан”.