Soltüstık Казахстан
Құрметті солтүстікқазақстандықтар!
Жаңа 2019 жылмен шынайы құттықтауымды қабыл алыңыздар! Жаңа жыл мерекесі – бұл отбасымыздың, туған-туысқандарымыздың ортасында атқарылған істерімізді қорытындылап, болашаққа жоспар құратын уақыт.
Биыл біз Тәуелсіздігіміздің 27 жылдығын атап өттік. Еліміздің қалыптасуында үстіміздегі жылы 20 жылдығын атап өткен Отанымыздың жүрегі – Астана қаласы аса маңызды рөл атқарады. Шын мәнінде сәулетшісі Елбасы болып табылатын қала Қазақстанның жауһарына, ХХІ ғасырдың ғажайып және сұлу астанасына айналды.
Өтіп бара жатқан 2018 жыл Солтүстік Қазақстанның тарихына қауырт еңбек, аса маңызды қоғамдық-саяси оқиғалар мен өңіріміздің әлеуметтік-экономикалық дамуын одан әрі жеделдетуге бағытталған маңызды шешімдер жылы ретінде енеді.
Үстіміздегі жыл өңірімізде ірі еңбек жеңістерімен айшықталды: дәнді-дақылдардан жоғары өнім алынды, өнеркәсіп өндірісінің көлемі ұлғайды, агроөнеркәсіптік кешенде ірі кәсіпорындар, жаңа жұмыс орындары ашылды.
Үстіміздегі жылғы 9 қараша күні Петропавл қаласында Қазақстан мен Ресей Президенттерінің қатысуымен өткен ХV өңіраралық ынтымақтастық форумы қарсаңында облыс орталығында орасан зор жұмыстар атқарылды.
Мемлекет басшысы Нұрсұлтан Әбішұлы Назарбаев биылғы қараша айында өзінің облысымызға сапары барысында атқарылған жұмыстарға жоғары бағасын берді.
Оқушылар сарайының, теннис орталығының ашылуы, Петропавл қаласындағы жол құрылысы бойынша жұмыстардың, халықаралық әуежайдың жаңғыртылуының аяқталуы солтүстікқазақстандықтар үшін үлкен және қуанышты оқиға болды. Жаңа мұсылман мешіті мен православиелік шіркеу облыс орталығының ажарын аша түсті.
11 желтоқсанда Индустриялизация күні аясында өткен телекөпірдің барысында Президентке Петропавл қаласындағы металлпластикалық бұйымдар шығаратын зауыт таныстырылды. Бүгіндері бұл – шикізаттарды қайта өңдеудің толық циклі бар және халық тұтынатын қажетті тауарлар шығаратын еліміздегі жалғыз зауыт.
Агроөнеркәсіптік секторда бірқатар ірі кәсіпорындар іске қосылды. Олардың ішінде крахмал, балуыз бен биоэталон шығаратын “Bio Operations” бірегей зауыты, 4 жаңа тауарлы-сүт кешені сияқты маңызды нысандар бар.
2019 жылдың да маңызды да, жағымды жаңалықтары көп болатыны сөзсіз. Мемлекет басшысының “Қазақстандықтардың əл-ауқатының өсуі: табыс пен тұрмыс сапасын арттыру” Жолдауы шеңберінде қолайлы қалалық орта құру, әлеуметтік-мәдени мақсаттағы жаңа нысандарды ашу, осызаманғы тұрғын үйлерді пайдалануға беру, тұрғындардың табыс деңгейін көтеру бойынша ауқымды жұмыстар жоспарланған.
Бірлескен жұмыстардың нәтижесінде біздің ойлаған жаңа жобаларымыз бен жоспарларымыздың жүзеге асатынына сенімдімін.
Қымбатты жерлестер!
Алдағы жыл әрқайсыңыз үшін игілік пен жаңа жетістіктер уақытына айналсын, әр отбасына денсаулық, молшылық пен бақыт әкелсін!
Мерекелеріңізбен! Жаңа 2019 жылмен!
Құмар АҚСАҚАЛОВ, Солтүстік Қазақстан облысының әкімі.