Soltüstık Казахстан
Петропавлдағы Сәбит Мұқанов атындағы облыстық ғылыми-әмбебап кітапханада Қазақстанның мәдениет қайраткері, ардагер ұстаз, өлкетанушы Қайролла Мұқановтың “Абылай Рамазанов – Алаш қайраткері” атты кітабының тұсаукесері өтті. Жиынға зиялы қауым өкілдері, автордың замандастары мен мектеп оқушылары қатысты.
Шарада Қазақстанның еңбек сіңірген қайраткері, жазушы Сұлтан Оразалин халқымыздың небір асыл азаматтарының жоқтаушысына айналған ардақты ұстаздың жаңа жинағына шолу жасап өтті. Қайролла Мұқанов бұл кітабында Қызылжар өңірінде өмір сүріп, саяси қуғын-сүргіннің құрбаны болған ұлт зиялысы Абылай Рамазанов жайлы қалам тербеген. Ұзақ жылдар бойы есімі елеусіз қалып келген азамат өз заманында Мағжан Жұмабаев, Міржақып Дулатов, Жұмағали Тілеулин сынды Алаш қайраткерлерінің жанында жүріп, оларға жан-жақты қолдау көрсеткен. Халықтың сауатын ашу мақсатында ауыл балаларына ұстаздық етіп, олардың Уфада, Омбыда, Стамбулда білім алуына жағдай жасаған. Түрлі дауларға төрелік айтқаны да тарихи деректерде кездеседі.
– Ел-жұртқа қайырымды болып, жомарттығымен аты шыққан ардақты тұлғаның еңбегі біраз уақыт бойы ескерілмей келгені анық. Бұл ретте аталмыш кітап Алаш қайраткерінің көпшілікке танылуына жол ашады. Қайролла Мұқановтың көп еңбектенгені, мұрағаттан құжаттар жинастырып, жан-жақты ізденгені анық байқалады, – деді Сұлтан Оразалин.
Бұдан соң жиында Абылай Рамазановтың немересі – Ауыл шаруашылығы ғылымдары академиясының академигі, профессор Аяз Рамазанов, Қазақстанның еңбек сіңірген қайраткері, белгілі ғалым Серік Негимов Алаш ардақтысының ата тегі, өмірі, қажылық сапары, қуғын-сүргінге ұшырауы туралы баяндады. Абылай қажының Меккеге сапар шегуі ХІХ ғасырдың 70-ші жылдарымен тұспа-тұс келеді. Ол Пайғамбарымыздың туған жеріне бір өзі ғана тәу етіп қоймай, басқа да қазақ азаматтарының қажылыққа баруына көмегін берген.
Жиын соңында әл-Фараби атындағы Қазақ ұлттық университетінің профессоры, тарих ғылымдарының кандидаты Гүлнәр Мұқанова елге қалтқысыз қызмет еткен қайраткерлерді ұлықтау, олардың есімін өскелең ұрпақ жадынан өшірмеу керектігін айтты.
Нұржан СЕЙІЛБЕКОВ, “Soltústik Qazaqstan”.