Soltüstık Казахстан
Тәртіп сақшыларына Аққайың ауданының 42 жастағы тұрғыны белгісіз біреу Петропавлдағы мейманханалардың бірінің алдында өзін тонап кеткенін айтып арызданған.
«Мейманханадан шыққан ауыл тұрғынының қолында 7 мың теңгесі болған. Бейтаныс адам келіп одан темекі сұраған, кейін қолындағы ақшасын тартып әкеткен. Жәбірленушінің көзі нашар көреді, мүгедек, сол себепті қылмыскердің түсін түстеп бере алмады», – дейді бірінші полиция бөлімінің жедел уәкілдері. Дегенмен, зағип жанға жасалған шабуыл бір сағатқа жетпей ашылды. Полицейлерге қонақ үйде орнатылған сыртқы бейнекамералардан алынған жазба көмектесті. Тез арада күдіктінің түр-әлпеті құрастырылды. «Іздестіруге кіріскен сақшылардың жұмысы нәтижелі болды. Күдікті қолға түсті. Ол ұрлық жасағаны үшін бұрын сотталған Қызылжар ауданының 23 жастағы тұрғыны болып шықты», – дейді Петропавл қалалық полиция басқармасы бірінші полиция бөлімінің бастығы Балабек Жахин. Аталған факті ҚР Қылмыстық кодексінің 191-бабы «Тонау» бойынша сотқа дейінгі тергеп-тексерудің бірыңғай тізіліміне енгізілді. Күдікті ешқайда кетпеу туралы қолхатпен босатылды.