Soltüstık Казахстан
Туриндік “Ювентус” клубының және Португалия құрамасының шабуылшысы Криштиану Роналду футбол тарихында соңғы 66 жыл өзгермеген рекордты жаңартты. Күні кеше Италия суперкубогы үшін “Наполимен” өткен матчта “Ювентус” 2:0 есебімен жеңіске жетіп, Италия суперкубогын тоғызыншы рет жеңіп алған болатын. Бұл кездесуде Роналду спорттық мансабындағы 760-шы голды соғып, футбол тарихындағы ең үздік бомбардир атанды. Ол – 15 маусым бойы кемінде 15 гол соққан жалғыз мерген. Португалиялық шебер 2006-2007 жылғы маусымнан бері ешқашан бұл межеден төмен түсіп көрмепті.
Футболдың сиқыры – қақпада тулаған добында. Аладопты серік еткен әрбір жеткіншек гол соғуды, өскенде шабуылшы болуды армандайтыны анық. Алайда, шеберлікпен қатар табиғатынан дарындылары ғана шабуыл шебіне аттанып, командасын алға жетелейді. Футбол тарихында Роналдудан басқа да голды қарша боратқан шабуылшылар аз болмаған.
Тулио Маравилья – 575 гол. Доп тебуді 1988 жылы “Гояс” клубында бастаған Тулио Маравилья 27 жылға созылған мансабында 40-тан астам команда ауыстырған екен. Олардың басым бөлігі бразилиялық клубтар. Еуропада тек Швейцарияның “Сьон” және Венгрияның “Уйпешт” командаларында ғана ойнады. Бас-аяғы 575 голдың авторы атанған Тулио Маравилья футбол тарихындағы үздік сұрмергендердің тізімінде 10-шы орынға жайғасқан.
Уве Зеелер – 575 гол. Неміс футболшысы спорттық мансабының басым бөлігін, яғни 1953 жылдан 1972 жылға дейін “Гамбург” командасында өткізген. ГФР құрамасының капитаны. Сондай-ақ, Германия құрамасымен төрт бірдей әлем чемпионатына қатысқан. Сұрмерген 1960 жылы “Алтын допқа” үміткер болып, дауыс беруде үшінші орын алды. 1970 жылы соңғы голын ширек финалда Англияның қақпасына соқты да, турнир біткен соң құрамамен қош айтысты. 1995 жылы біраз уақыт “Гамбург” командасының президенті қызметін атқарды. Бүгінде кәсіпкерлікпен айналысады.
Ференц Деак – 576 гол. Футболшы бар ғұмырын тек бір чемпионатта ғана өткізген. Ференц Деак ресми гол саны бойынша Уве Зеелерден бір допқа артық соққан. Венгрияның “Ференцварош” және “Дожа” секілді белді командаларында ойнап, көзге түскен. Оған қоса Венгрия құрамасының жейдесімен 20 матчқа шығып, 29 голдың авторы атанған.
Герд Мюллер – 735 гол. Қатысқан барлық турнирде сұрмерген атанған Герд Мюллер футболшылық ғұмырының жартысын “Баварияға” арнаған. Мюнхендік командамен чемпиондар лигасында, құрлықаралық кубокта топ жарған. Үздік ойыны үшін “Алтын доп” және “Алтын бутсымен” марапатталды. Сондай-ақ, Германия құрамасының сапында Әлем және Еуропа чемпионы атанды.
Ференц Пушкаш – 746 гол. Әйгілі футболшы және бапкер. Даңқты венгр “Реалдың” нағыз аңызына айналған. Корольдік командамен Еуропа чемпиондары кубогын үш мәрте жеңіп алды. 1952 жылғы Олимпиаданың алтыны мен 1954 жылғы әлем чемпионатының күміс жүлдесін қанжығысына байлады. Ол кездері Пушкаштың соққан барлық голы есепке алынбағаны анық. Дегенмен, оның жүлделері жанкүйерлердің жадынан кетпейтіні анық. Ол Венгрия чемпионатының бес дүркін жеңімпазы. Пушкаш ресми 754 матч өткізіп, 746 гол соғып, нағыз шабуылшының қандай болатынын дәлелдеп кеткен.
Лионель Месси – 747 гол. Әлемнің дәл қазіргі сәттегі үздік футболшыларының бірі. Аргентина ұлттық құрамасы мен “Барселона” клубының шабуылшысы. 2011 жылдан бері Аргентина құрамасының капитаны. Аргентина құрамасы мен “Барселона” клубы тарихындағы ең үздік мерген. Алты рет “Алтын бутсы” иегері атанды. Бір рет әлем чемпионатының (2014), екі рет Америка кубогының (2015, 2016) күміс жүлдесін иеленді. Соққан голының саны басты бәсекелесі Криштиану Роналдудан 13 допқа аз.
Пеле – 757 гол. Футбол аңызы Пеле “Сантостың” сапында бар белесті бағындырды. Әйгілі бразилиялық XX ғасырдың үздік футболшысы, үш дүркін әлем чемпионы атанған. Пеле Халықаралық олимпиада комитетiнің ұйғарымы бойынша “XX ғасырдың спортшысы” деп мойындалды. Бразилия құрамасында 92 матч өткізіп 78 гол соққан. 1970 жылғы әлем чемпионатының үздік ойыншысы. 1958 жылғы әлем чемпионатының ең үздік жас футболшысы.
Йозеф Бицан – 759 гол. Әлемдік рекорд ұзақ уақыт футбол тарихындағы – Йозеф Бицанға тиесілі еді. Австрия мен Чехословакияда ойнаған Йозеф Бицан екі елдің де ұлттық құрамасының жейдесінде доп тепті. Түрлі ақпарат көздері түрлі мәлімет ұсынады. Даңқты шабуылшы 1930 жылдан 1955 жылға дейін 805 гол соқты деген де дерек бар. Алайда, ол есепке жастар мен жасөспірімдер арасында ойнап жүргенде соққан голдары да енгізілген сыңайлы.
Қанат АТАМАНОВ,
“Soltústik Qazaqstan”.