ЖЕТЕУІ ЖАЗАЛАНДЫ

Soltüstık Казахстан

 Kyzylzhar_akparat@mail.ru

Тайынша ауданындағы Обухов кен-байыту комбинатының аумағында былтыр маусым айында болған төбелеске қатысты сот үкім шығарды. Тайынша аудандық №2 соты қылмыстық істі қарап, жұдырық ала жүгірген жеті адамға жаза тағайындады.

Тайынша аудандық №2 сотының мәлі­ме­тін­ше, сотталушы К.В. Саверский “Тио­лайн” ЖШС-і директорының орынбасары болып тағайындалған. Бірақ оны кәсіпорын аумағына кіргізбегендіктен, құрылтайшы­лар­дың бір бөлігі сотқа шағымданған.
Сот серіктестіктің құрылтайшысы В.И. Дол­галевтің, бұрынғы директоры Т.Е.Ал­мас­баевтың, “Stal KZ” ЖШС-і – күзет кә­сіпорнының және “Обухов кен-байыту кә­сіп­орны” ЖШС-нің К.Саверскийді кәсіп­орын аумағына кіргізбеуін заңсыз деп таба­ды. Алайда, К.Саверский сот үкімінің заңды күшіне енуін күтпей, өзі жалдаған күзет агенттігінің қызметкерлері М.Ж. Кеңесбай, Е.К.Майданов, С.Т. Медеубаев, А.Г. Бах­ты­баев, Д.К. Жаппаров және К.Н. Секеновпен кен-байыту комбинатының аумағына күш қолдану арқылы кірмек болған. Соңы төбе­леске ұласқан. Олардың кінәсі зардап ше­гу­шілердің, куәгерлердің түсініктемесімен және сараптама қорытындысымен толық дәлелденді.
М.Ж. Кеңесбай, Е.К.Майданов, С.Т. Ме­деу­баев, А.Г. Бахтыбаев және Д.К. Жап­па­ров өз кінәларын мойындады. Сот үкім шы­ғару барысында олардың бұрын сотталма­ға­нын есепке алып, әрқайсысын 1 жыл 6 ай­ға бас бостандығынан айырды. Қылмысты ұйымдастырған К.Саверский 2 жылға сот­талды. Ол жазасын қылмыстық-атқару жү­йе­сі­нің қауіпсіздік деңгейі төмен мекеме­сін­де өткереді. Ал төбелес барысында пышақ қолданып, кәсіпорын қызметкерлерінің бірін жеңіл жаралаған К.Н. Секенов 1 жыл 6 айын колонияда өткізеді.
Сондай-ақ, сотталғандар моральдық зиян келтіргені үшін зардап шеккендерге өтемақы төледі.
Естеріңізге салайық, былтыр маусым айында Тайынша ауданындағы Обухов­ кен-байыту комбинатының аумағына 30 шақты адам келіп, басып кірмек болады. Кәсіпорын қызметкерлері оларға тойтарыс беріп, салдарынан 10 адам түрлі жарақат алады. Кен-байыту комбинатының аума­ғы­на бірден жедел-тергеу тобы жіберілді. Тәр­тіп сақшылары “Тиолайн” ЖШС-інің жеті құ­рылтайшысының екеуінің өздерімен бірге күзет агенттіктерінің өкілдерін әкелгендігін анықтады.
“Тиолайн” ЖШС-і титан-цирконий кенін өн­діріп, байытумен айналысады. Серік­тес­тік 2004 жылы әділет органдарында тірке­ліп, кен орнының жанынан кен-байыту ком­бинатын салды. Серіктестіктің қазір жеті құрылтайшысы бар.

Ақерке ДӘУРЕНБЕКҚЫЗЫ.

Сурет: https://egov.kz/