Soltüstık Казахстан
Мемлекеттік мүлікті тиімді пайдалану – Қаржы министрлігі Мемлекеттік мүлік және жекешелендіру комитетінің Солтүстік Қазақстан облысы бойынша департаменті қызметінің негізгі бағыттарының бірі. Біздің мамандар бұл бағыттағы жұмыстарды тиімді жүргізу үшін сандық технологиялардың көмегіне көп жүгінеді.
Озық технологиялар біздің өмірімізге тез енуде. Ғаламтор, жасанды интеллект, құлтемірлер, әлеуметтік желілер, бұлтты технологиялар, киберқауіпсіздік және тағы басқа жаңашылдықтарды атап айтуға болады. Алайда, жаңа ұғымдар мен құбылыстар туралы естігені болмаса, арамызда оны пайдалануды білмейтіндер де бар. Бүгінгі таңда көптеген шаруаларды ғаламтордың көмегімен атқаруға болады. Аукциондардың өзі интернетке көшкеніне де біраз уақыт болып қалды. Бірақ жерлестеріміздің бірқатары мемлекеттік меншікті жекешелендіру мақсатында ашылған www.gosreestr.kz веб-порталы барынан бейхабар.
Бұл сайтта мемлекеттік меншікті сату бойынша конкурстар өткізіледі. Қазақстандықтардың ұсыныстары ескеріле отырып жасалған портал азаматтардың мемлекеттік меншікті жекешелендіруге қатысу үрдісін жеңілдете түсті. Мысалы, сайтта тегін тіркелуге болады, әрі қарай да сайтты пайдалану ақы төлеуді қажет етпейді. Аукциондар электронды форматта өткізіледі. Ал кепілдік жарналарын үйден шықпай онлайн режімінде төлеу мүмкіндігі қарастырылған.
Пандемия кезінде көптеген қоғамдық іс-шараларға шектеулер енгізілгенін білеміз. Бұл кезде мемлекеттік мүлікті жекешелендіру бойынша жұмыстар электронды форматта жүргізілді. Яғни, жұмыстың бір сағатқа да тоқтамағанын атап өткім келеді. Сайттың статистикалық деректеріне сәйкес біздің департамент 2020 жылы құны 24 миллион теңгеден асатын 47 мемлекеттік мүлік нысанын жекешелендірді. Соның ішінде әдетте заңды тұлғалардың қызғушылығын тудыра қоймайтын республикалық меншіктегі нысандар мен ғимаратты жөндеу үшін кететін қаражат жаңасын салуға кететін шығыннан асып түсетін тозығы жеткен нысандар да бар. Мәселен, жалпы аумағы 4784,2 шаршы метрді құраған цехтан біздің департамент 1429313 теңге пайда түсірді. Нысан электронды аукционда бағаны төмендету әдісімен сатылды.
Былтыр мүлікті сатудан түскен қаражаттың 1429313 теңгесі қираған ғимараттарды, ал қалған 23274217 теңге автокөлік, құрал-жабдықтар және басқа да мүліктерді сатудан түсті. Департамент басшылығы ашық диалог жүргізуге әрдайым дайын екенін атап айтқым келеді. Солтүстікқазақстандықтар тарапынан қандай да бір сұрақтар туындаған кезде біздің департаментке 8(7152)46-56-16 нөмірі бойынша хабарласып, мамандардан кеңес ала алады.
Далабай ҚАБДУАЛИЕВ,
мемлекеттік мүлік және жекешелендіру
департаментінің бөлім басшысы.