Soltüstık Казахстан
Экология, геология және табиғи ресурстар министрлігі Қазақстанның «Қызыл кітабына» жолбарыс, Оңтүстік-Батыс Азия қабыланы және керқұлан (Пржевальский жылқысы) кіргенін хабарлайды.
«Өсімдіктер мен жануарлардың сирек кездесетін және құрып кету қаупі төнген түрлерінің тізбесін бекіту туралы» Қазақстан Республикасы Үкіметінің 2006 жылғы 31 қазандағы №1034 қаулысына толықтырулар енгізу бұған негіз болды.
Айта кетейік, Азия қабыланы популяциясының әлемдегі жалпы саны 870-1,3 мың басты құрайды, Қазақстанда тек Үстірт мемлекеттік табиғи қорығында ғана кездеседі. Сонымен қатар бүгінгі таңда Экология, геология және табиғи ресурстары министрлігі Балқаш маңындағы жолбарыстарды қалпына келтірудің 15 жылға арналған бағдарламасын жасады. Бұл аңның мекен ету ортасын дайындау, жолбарысты табиғатқа жіберу және бағдарламаның жүзеге асуын бақылау шараларын қамтиды.
Пржевальский жылқысы жабайы жылқылардың кіші түрлеріне жатады, жылқы тұқымының сирек кездесетін өкілдерінің бірі. Елде шамамен 10 шақты бас бар. Еске сала кетейік, қазіргі таңда Қазақстанның «Қызыл кітабына» өсімдіктердің 400-ге жуық түрі мен омыртқалы жануарлардың 133 түрі енген.
https://egemen.kz