Soltüstık Казахстан
Өңір диқандары көктемгі егіс науқанын толық аяқтады. Агроқұрылымдар уақытпен санаспай еңбек етіп, дән сіңіру жұмыстарын мерзімінде бітіру үшін қолдан келгеннің бәрін жасады.
Солтүстікқазақстандық шаруалар жауапты науқанды мамыр айының екінші онкүндігінде бастаған болатын. Облыстық ауыл шаруашылығы және жер қатынастары басқармасы мамандарының мәліметінше, жұмысқа білек сыбана кіріскен диқандар 4,2 млн. гектар егіс алқабының 2,9 млн. гектарына бидай сіңірді. Майлы дақылға арналған алқап 892 мың гектар. Сонымен қатар осы күнге дейін 31,1 мың гектар жерге картоп пен 6,1 мың гектарға көкөніс отырғызылды. Қазір көпжылдық және біржылдық шөптер егілуде.
Жергілікті ауыл шаруашылығы құрылымдары минералды тыңайтқыштармен, пестицидтермен және жанар-жағармаймен толық қамтамасыз етілген. Биыл 153 мың тонна тыңайтқыш жеткізу бойынша келісімшарт жасалса, соның 101 мың тоннасы топыраққа сіңірілді.
Жаз – шаруалар үшін нағыз қауырт шақ. Атқарылуы тиіс маңызды шаралардың бірі – зиянкестермен күрес. Жыл сайын зиянкестердің отызға жуық түрі алқаптарға қауіп төндіретінін атап айтқан жөн. Сондықтан астық шығымдылығын және ауыл шаруашылығы өнімдерінің сапасын арттыру үшін уақтылы жүргізілген дәрілеудің маңызы зор.
Нұржан СЕЙІЛБЕКОВ,
“Soltüstık Qazaqstan”.
Суретті түсірген
Талғат ТӘНІБАЕВ.