Soltüstık Казахстан
Сәбит Мұқанов атындағы облыстық қазақ сазды-драма театрының ұжымы көрерменге “Қарапайым адам” спектаклін ұсынды. Аталмыш туынды серб жазушысы, драматург Бранислав Нушичтың “Обыкновенный человек” пьесасының желісі негізінде жазылған. Премьераның қоюшы режиссері – Тәжікстанның еңбек сіңірген қайраткері Барзу Абдураззаков.
Сахналық қойылымның оқиға желісі бойынша Кеңес одағына танымал Ақжан есімді жас ақын сол кезеңнің саясатын сынап, бір-екі шумақ өлең жазады. Қаламгердің жыр жолдары газет бетіне басылып, оқырман қауымның қолына жетеді. Әлбетте, бұл әрекеті шенділерге ұнамай, ақынға іздеу жарияланады. Барар жер таппаған соң ол досының үйін паналап, өзін өзгелерге Төлебай деп таныстырады. Кейін Ақжан сол үйдің қызына ғашық болып қалады. Өзінің кім екенін айтса, биліктің қолына тапсырып жібере ме деп, абақтыдан үріккен күйі осы отбасында біраз уақытқа тұрақтайды. Ақыр соңында шындықтың беті ашылып, оқиға жақсылықпен аяқталады.
Театр директоры Біржан Жалғасбаевтың айтуынша, осы жолы қарашаңырақ ұжымы көрерменге жеңіл қабылданатын спектакльді сахнаналауды жөн көрген. Өнерсүйер қауымға ұнаған жаңа туынды – қазақ сазды-драма театрының Барзу Абдураззаковпен бірлесе жарыққа шығарған екінші спектаклі. Бұған дейін 2015 жылы көрермен назарына “Ревизор” комедиясы ұсынылған болатын.
Нұрсұлтан ТІЛЕКТЕСОВ.
Суретті түсірген
Талғат ТӘНІБАЕВ.