Soltüstık Казахстан
Саналы ғұмырын ұрпақ тәрбиесіне арнаған, жаны ізгілік шуағымен жадыраған ұлағатты ұстаз, білікті басшы Асқар Игібаевтың есімі өңір жұртшылығы үшін аса қадірлі. Артына өлмейтұғын іс, өшпес із қалдырған ардақты азамат көзі тірі болса биыл 90 жасқа толар еді. Бекзат ғұмыр иесінің мерейтойына орай зайыбы Қалима Мәкенқызы мен ұлы Мұхтар “Қалдырған ізі мәңгілік” атты кітап шығарып, көзі қарақты оқырманды олжаға кенелтті. Кітапты құрастырған және алғы сөзін жазған жазушы, журналист Жарасбай Сүлейменов. Бұл еңбекте Асқар Игібайұлымен әр жылдары бірге қызмет істеген әріптестерінің, алдынан тәлім-тәрбие алған шәкірттерінің естеліктері топтастырылған.
“Ешқандай әбес қылық жасап көрмеген Асқардай адам көп емес шығар-ау!.. Оның өзі де, сөзі де – бәрі де асқан мәдениетті адам екендігін паш етіп тұратын. Киіміне қылау түсірмеген ол тазалықтың адамы еді. Тіпті менің етігімді де айнадай жалтыратып қоятындығы есіме түсіп кеткенде еріксіз жылап аламын…”, – деген Қалима Мәкенқызының қимастық пен сағынышқа толы естелігі көңіл толқытады. Кітапта азаматтық келбетіне қылау түсірмей, ел-жұртының шынайы құрметіне бөленген ұлағатты ұстаз туралы Ескендір Нұрымов, Құдайберген Қалиев, Қайрат Есқожин, Болат Қожахметов, Абай Тасболатов, Қырғыз Мұсабаев және басқа азаматтардың жазғандары оқырманға қызық деп ойлаймын. Жинақта ұстаздың өнегелі өмірінен сыр шертер суреттер де орын алған екен. Өлшеусіз еңбектің өтеуі ретінде Асқар Игібайұлының әр жылдары алған марапаттары мен құжаттары да кітаптың мазмұнын аша түскендей.
Ақмарал ЕСДӘУЛЕТОВА,
“Soltüstık Qazaqstan”.