Soltüstık Казахстан
Елімізде 2014 жылдан бастап “Мәңгілік ел жастары – индустрияға!” – “Серпін – 2050” әлеуметтік жобасы жүзеге асырылуда. Содан бері жұмыс күші көп Алматы, Түркістан, Жамбыл, Қызылорда, Маңғыстау облыстарының түлектері солтүстік өңірлерде тегін оқу мүмкіндігіне ие болуда. Өңір басшысы Құмар Ақсақалов М.Қозыбаев атындағы Солтүстік Қазақстан университетінде аталмыш бағдарламаның игілігін көріп жатқан студенттермен кездесті. Жиында жергілікті жердегі кадр тапшылығын азайтады деген серпіндіктерге қандай жағдай жасалғаны баяндалды.
– Өткен жеті жылдан бері бағдарлама бойынша Қызылжар өңіріне 2 мыңнан астам ұл мен қыз оқуға түсті. Солардың 955-і оқуын аяқтады. Бүгінгі күні 825 студент – М.Қозыбаев атындағы Солтүстік Қазақстан университетінде, 95-і Мағжан Жұмабаев атындағы жоғары колледжде білім алуда. Оқуды аяқтаған соң бәріңізді біздің өңірде қалып, жұмыс істеуге шақырамын. Жұмысқа орналасуда көмек көрсетуге әзірміз. Шаһарымыз жастардың қаласы болуы керек. Бұл ретте университетіміздің материалдық-техникалық базасы жаңғыртылуда. Келесі жылдан бастап жаңа оқу корпустары, жатақханалар ашылатын болады. Қазір университетіміздің 73 заманауи зертханасы бар оқу-зертханалық корпусының құрылысы жүргізілуде. Сондай-ақ ынтымақтастық мақсатта АҚШ-тың Аризона университеті басшылығымен келіссөздер жүргізудеміз. Тағы бір жақсы жаңалық – облыс орталығында Назарбаев университетінің үлгісінде жаңа жоғары оқу орны ашылады, – деді Құмар Іргебайұлы.
Университет проректоры Жанар Таласпаеваның айтуынша, 2014 жылдан бері білім ордасына “Серпін – 2050” бағдарламасы бойынша 1546 студент оқуға түскен. Соңғы үш жылда 575 студент оқуын тамамдады. Осы оқу жылдарында серпіндіктер 35 мамандық бойынша білім алды.
Серпіндіктер жатақханамен толықтай қамтылған. Биыл мемлекеттік-жекешелік әріптестік негізінде 2 жатақхана салу жоспарланып отыр. Студенттер бос уақыттарын тиімді пайдалану мақсатында “Шаңырақ” театры, “Шертер” ансамблі мен спорттық үйірмелерге белсене қатысады. Былтыр “Серпін – 2050” бағдарламасы бойынша оқу бітірген 203 түлектің 77-сі өңірде жұмысқа орналасса, 92-сі магистратурада білімін жалғастыруда. Оқуға түсіп, жұмысқа орналасқандар барлық студенттің 94 пайызын құрайды. Биыл 237 студент оқуын аяқтайды деп күтілуде. Облыс басқармаларымен бірлесе отырып түлектерді жұмысқа орналастыру белсенді жүргізілуде. Әрбір түлекке жұмыс орны ұсынылмақ. Мәселен, Петропавл электротехникалық зауытына – 31, “Claas” зауытына 4 түлек жұмысқа алынбақ.
“Серпін – 2050” бағдарламасының шапағатын көрген жастардың бірі – Түркістан облысының тумасы Алина Сейтім. М.Қозыбаев атындағы Солтүстік Қазақстан университетінің түлегі қазір Петропавлдағы №26 орта мектепте мұғалім болып жемісті еңбек етіп жүр. Талапты бойжеткен серпіндіктерді аққайыңдар өлкесінде тұрақтап, жұмысқа орналасып, шаңырақ көтеруге шақырды.
Нұржан СЕЙІЛБЕКОВ,
“Soltüstık Qazaqstan”.
Суретті түсірген
Талғат ТӘНІБАЕВ.