Атажұртым – аңсарым!

Soltüstık Казахстан

 Kyzylzhar_akparat@mail.ru

Белгілі ақын Қасым Аманжолов “Неткен байтақ, неткен ұлы жер едің, нендей күйге жүрегімді бөле­дің”, – деп жырлаған қазақ жері – менің де қасиетті мекенім. Ата жұрт – мағынасы аса кең ұғым. Ол – бақытымыздың тұрағы. Біздің хал­қымызда туған жерді қасиет тұту – қанымызға сіңген мінез. Бұл таным жанымызға ана сүтімен та­рап, ана тілімізбен дарыған.

Туған жеріміздегі жайнаған гүл­дер, жай­қалған шалғындар, жа­сыл орман­дар, сылдыраған бұ­лақтар, кері­ліп жатқан кең дала, жарық ай, жар­қыраған жұлдыздар, мөлдір аспан мен күлімдеген күн – бәрі-бәрі бізге қымбат. Осын­­дай та­маша жерде өмір сү­ріп, білім алу – мен үшін үлкен ба­қыт!

Мен шетелде тудым. Көзімді аш­­қанда көргенім басқа жер бол­ды. Бірақ тілім, дінім, салт-дәстүрімді сақтап, қазақ екенімді ұмыт­падым. Адам туылып, ерже­тетін жерін өзі таңдамайды екен. Мен жарты әлемді жаулаған Шың­ғыс ханның Отаны – Моңғо­лия мем­лекетінде дүниеге келдім. Та­биғаты әсем, тауы аспанмен та­ласқан туған өлкем – Баян-Өлгей аймағы. Моңғолия қазақтарының 95 пайызы шоғырланған бұл өлке – салтқа бекем, дінді жү­рекке бекіткен, қазақ тілін таңдайында сақтаған қандастардың ме­кені. Мен де кішкентай кезімнен салт-дәстүрді, қазақылықты бойы­ма сіңіріп өстім. Менің балалық шағымның куәсі Моңғолия болса, табан тірейтін жерім, жарқын болашағым – атамекенім Қазақстан деп айтар едім. Қазір мен Пет­ро­павл қаласындағы М.Қозыбаев атындағы Солтүстік Қазақстан уни­верситетінде журналистика ка­фед­расында оқимын. Мұнда өзге елдерден келген қандас­тарымыз көп. Бәріміз де атақо­ныста білім алып жатқанымызға қуаныш­тымыз.

Болашақ ұрпақ үшін ата-баба­мыз ақ білегінің күшімен, ақ найза­сының ұшымен қорғаған қазақ жерінде өмір сүру мен үшін үлкен бақыт. Қазақтың болашағын жал­ғаушы ұрпақ ретінде ата-бабамыздан аманат болып қалған жерді бағалау, құрметтеу, қорғау – парызымыз. Атақты қолбасшы Шыңғыс ханның: “Өзімнен күш қуат кетсе де, ақыл-ойдан адас­тырмасын, бүтін денем жара­ланса да, тұтас елім бөлінбесін”, – деп айтуынан Отанға деген ма­хаббатын айқын көруге болады. “Мен қазақпын!” деп айту үшін отансүйгіштік рух болуы керек. Кие­лі Қазақ елі нығаюы үшін аза­маттарының әрқайсысы шама-шарқынша елі үшін еңбектенуі тиіс. Атажұртқа оралған әрбір қыз-жігіт “Мен – қазақпын!” деп зор мақтанышпен айта алады.

Айнұр АЗБЕК,

М.Қозыбаев атындағы СҚУ-дің студенті.