Soltüstık Казахстан
Соңғы жылдары елімізде құрылыс индустриясы қарқын алып, зәулім ғимараттар, жаңа ықшам-аудандар пайда бола бастады. Аспанмен таласқан көпқабатты үйлер ерекше сыртқы архитектуралық келбетімен көз тартады. Бүгінде құрылыс саласында қазақстандық үлесті молайтуға ерекше назар аударылып отыр. Соған орай отандық құрылыс материалдарын шығаруға маманданып, жылдам тұрғызылатын ғимараттар салумен айналысатын біздің серіктестікте сертификаттаудан өткен дайын өнімдерден бастап, тапсырыс берушілірге дейінгі аралық жұмыстарды өз ісінің бесаспап мамандары мен тәжірибелі жұмысшылар атқарады.
2009 жылы Елбасы Нұрсұлтан Назарбаевтың қатысуымен Үдемелі индустриялық-инновациялық даму бағдарламасы аясында пайдалануға берілген кәсіпорын тез құрастырылатын металл құрылғыларын шығаратын өндіріс орнына айналды. Шыны керек, көп жыл бойы иесіз тұрған темір-бетон бұйымдары зауытының өндірістік ғимаратын қалпына келтіріп, іске қосу оңайға соққан жоқ. Дегенмен “Даму” кәсіпкерлікті дамыту қорынан берілген жеңілдетілген несиелер мен тиімді мемлекеттік жобалардың демеуімен ішкі мүмкіндіктерімізді есепке ала отырып, Қазақстан нарығынан өз орнымызды табуға ұмтылдық. Металл құрылғылар, сондай-ақ сэндвич панельдер, С үлгісіндегі құйма профильдер, профтақталар өндіретін облыстағы жалғыз кәсіпорын ретінде уақыт талабымен үндесетін заманауи өндіріс ошағын құруға бел шеше кірістік.
Түрлі пішіндегі темір материалдар Теміртаудан, Ресейдің Магнитогорск қаласынан жеткізіліп, өнім шығаруға кеңінен пайдаланылды. Темір кесу және дәнекерлеу үшін озық технологиялық жабдықтар алынып, алға ілгерілеудің жолдары тынымсыз іздестірілді. Республикалық “Сапа” байқауына қатысып, жеңімпаз атануымыздың арқасында танымалдығымыз артып, мал қораларына, қоймаларға, әкімшілік нысандарға тапсырыстар түсе бастады. Өйткені металл құрылымдар пайдаланылмайтын өндіріс орындары кемде-кем. Осыған орай шағын темір құрылғылар шығарумен шектелмей, инвестициялық жобалар шеңберінде ірі көлемдегі тапсырыстар орындауды мақсат еттік. Жедел тұрғызылатын құрылыс нысандары зор сұранысқа ие екені қаңқасыз ангарлар тұрғызу кезінде анық байқалды. Бір ғана мысал, 2400 бас ірі қараға лайықталған үш ангар – Ақмола облысының Ақкөл ауданында жедел түрде тұрғызылды.
Құрылыс саласындағы мол мүмкіндігімізді, ілкімді істерімізді байқаған болуы керек, астананың құрылысына қатысуға сұраныстар түсе бастады. Біз мұны ұжымға көрсетілген үлкен сенім ретінде бағаладық. Есілдің қос жағалауында орналасқан Қазақстанның бас қаласының қайталанбас келбетіне, ұлттық нақышына үлес қосқанымызды мақтан етеміз.
Елбасы Нұрсұлтан Назарбаев “Евразия жүрегінде” кітабында жазғандай, “Ерке Есіл жағасында бой көтерген ерекше сәулеттік ландшафты бар, бірегей мүсіндік нышандары сап түзеген, жоғары технологиялық болашаққа ұмтылған, өзгені сыйлап, өзінің жаңа астанасы мен өз елін шексіз мақтан тұтатын көпұлтты және көпдінді халқы бар әсем де мейірлі астанамыз, міне, осындай қала”. Біз он жылға жуық уақыт елорданың өркендеуіне атсалысып келеміз. Опера және балет театрының негізгі металл конструкциялық тірек құрамаларын орнаттық. Халықаралық әуежайдың бизнес терминалы, теннис корты, “12 месяцев” сауда үйі, Есіл өзеніне салынған жаңа көпір, сорғы стансасы, тағы басқа нысандарды салу жұмыстары үлкен жауапкершілікпен атқарылып, айшықты қолтаңбамызды қалдырдық. Металл қаңқаларын пішіп-кесу Мәскеу қаласында лицензияланған 3Д модельдеу заманауи технологиясы арқылы өте дәлдікпен атқарылды.
Қысқы Универсиада нысандарының бірі – 3 мың орынға шақталған мұз айдынына қажетті 2400 тонна темір құрылым дер кезінде жеткізіліп, құрастырылып берілгеннен кейін “ЭКСПО – 2017” көрмесінің ғимараттарын тұрғызуға отандық құрылыс компаниялары қатарында арнайы шақырту алуымыз –зор жетістіктеріміздің бірі. “Нұр әлем” павильонын салуға 1500 тонна металл құрылғыларын дайындадық.
Осылайша бас қаламыздың бет-бейнесін айшықтауға хал-қадерімізше еңбек етіп келеміз. Қазіргі таңда да біздің сапалы өнімімізге деген сұраныс жоғары. Биыл Нұр-Сұлтан қаласында бой көтеретін жаңа мешіттің тұрғызылуына белсене атсалысудамыз. Басқа тапсырыстар да жоқ емес.
Азамат БЕКҚОЖИНОВ,
Жылдам тұрғызылатын ғимараттар зауытының директоры.