Soltüstık Казахстан
Шілденің 1-і күні облыста 27 тұрғынның қауіпті дертке шалдыққаны белгілі болды. Жалпы пандемия басталғалы коронавирус инфекциясын 15315 адам жұқтырды. Бұл жайында орталық коммуникациялар қызметінің өңірлік филиалында өткен баспасөз конференциясында айтылды.
Облыс орталығында індет 11 адамнан анықталса, Қызылжар және Айыртау аудандарында – 4, Тайынша ауданында – 3, Уәлиханов, Есіл, Ғабит Мүсірепов атындағы аудандардада бір жағдайдан тіркелді. Бір аптаның ішінде коронавирус инфекциясын жұқтырғандар саны 109-дан 129-ға жетті. Эпидемиологиялық жағдай тұрақты емес. Сондықтан 5 шілдеден бастап шектеулер енгізілмек: қоғамдық тамақтану нысандарының жұмыс уақыты 24.00-ге дейін қысқарады; спорттық іс-шаралар толымдылығы 15 пайыздан аспаған кезде, театрлар, кинотеатрлар, концерт залдарының жұмысы көрермендер орындар санының 20 пайызынан аспаған кезде жұмыс істейді; қызметкерлердің кемінде 50 пайызы қашықтықтан жұмыс істеуі тиіс; мектепке дейінгі мекемелерде тек кезекші топтардың (25 адамнан аспайтын) жұмысына, балалардың түзету кабинеттерінің, білім беру орталықтарының жұмысына алдын ала жазылу бойынша 15 адамнан аспайтын топқа рұқсат етіледі. Бұл шектеулердің “Ашық” жобасын енгізген кәсіпкерлік нысандарына қатысы жоқ.
Еліміздің бас мемлекеттік санитарлық дәрігерінің қаулысына өзгерістер енгізілді. Оған сәйкес “COVID-19”-ға қарсы вакцина алмаған қызметкерлер қызмет көрсету, көтерме және бөлшек сауда, мәдениет және демалыс, қызмет көрсету саласындағы нысандарға, жолаушылар тасымалын жүзеге асыратын, білім беру және тәрбиелеу ұйымдарының, санаторийлік-курорттық және сауықтыру мақсатындағы, қоғамдық тамақтану, барлық үлгідегі медициналық-әлеуметтік, денсаулық сақтау ұйымдарына, оның ішінде зертханалар, коммуналдық шаруашылық объектілеріне, экскурсиялық қызмет көрсететін ұйымдарға, ойын-сауық орталықтарына жұмысқа бара алмайды.
Рабиға ЕРАЛЫ,
“Soltüstık Qazaqstan”.