Soltüstık Казахстан
“Отан – отбасынан басталады” деген нақыл бекер айтылмаған. Елге деген сүйіспеншілік пен құрмет отбасында пайда болып, мектеп қабырғасында қалыптасып, қоғамда одан әрі беки түседі. Туған жердің қадірін түсінген жан ғана нағыз отансүйгіш азамат болады. Менің спорт саласын таңдауым – еліме деген шынайы сезімімді айқын көрсетеді деп ойлаймын. Соңғы 15 жылдың ішінде мен түрлі деңгейдегі жарыстарға қатысып, елімнің көк байрағын талай мәрте желбіреттім. Тынымсыз еңбектің арқасында гір спортынан тоғыз дүркін әлем чемпионы, 2012 жылғы әлемнің абсолютті чемпионы, классикалық қоссайыста Қазақстанның абсолютті рекордшысы, армрестлингтен Қазақстанның чемпионы атандым.
Қарсыластарымды жеңіп, жеңіс тұғырының биік сатысына көтерілгенде елімнің Туы жоғарыда желбіреп, Әнұраны шырқалатын сәтте бойымды ерекше мақтаныш сезімі билейді. Сол сәттерде елімнің алдындағы тағы бір парызымды өтегендей боламын.
Тәуелсіздік жылдары Қазақстан талай жетістікке қол жеткізді, соның ішінде спортта бағындырған белестері бір төбе. Әлемдік деңгейдегі жарыстарда, Олимпиада ойындарында талай мәрте біздің спортшыларымыз ел намысын абыроймен қорғап, жеңіс тұғырынан көріне білді. Бұл қазақстандық спорттың әлеуеті артқанын дәлелдейді. Түрлі жарыстарда жеңіске жеткен спортшыларымыз әлемдік спорттың дамуына да баға жетпес үлестерін қосып жүр.
Қызылжар ауданы әлемдік деңгейде өнер көрсететін спортшылардан кенде емес. Атап айтсақ, Александр Винокуров – 2012 жылғы Олимпиада чемпионы, Алексей Луценко да – талай сайыстарда мерейі үстем болған кәсіби велосипедші. Мұның бәрі – елімізде саламатты өмір салтына, спорт саласына көп көңіл бөлінетінін көрсетеді. Қазіргі таңда ауданымыздың әр ауылында спорт алаңдары бар, алуан түрлі үйірмелер жұмыс істейді. Балалар жастайынан әртүрлі спорт түрлерімен айналысса, республикалық турнирлердің ғана емес, халықаралық жарыстардың да жүлдегерлері атана алатынын біледі. Мен осындай мүмкіндік тудырғаны үшін еліме шын жүректен алғысымды білдіргім келеді.
Виталий ДИДЕНКО,
Қазақстан Республикасының еңбек сіңірген спорт шебері, гір спортынан тоғыз дүркін әлем чемпионы.