Soltüstık Казахстан
Футболдан Еуропа чемпионатының финалына жолдама алған құрамалар белгілі болды. Италия – Испания кездесуінде матч тағдырын пенальти сериясы шешсе, Англия – Дания ойынында қосымша уақыттан соң ақтық сынға өткен команда анықталды.
Қос жартылай финал да Англияның астанасы – Лондондағы “Уэмбли” стадионында өтті. Шілденің 6-сы күні Италия – Испания жұбы финалға алғашқы жолдаманы сарапқа салды. Бұл кездесуде құрамалардың бас бапкерлері Паоло Манчини мен Луис Энрикенің стратегиялық шайқасы анық көрінді. Екі команданың ойыншылары бір-біріне дес бермеуге тырысқанымен, ойынның 60-минутында Федерико Кьеза есеп ашты. Кейін 80-минутта Альваро Марато таразы басын теңестірді. Осылайша матч экстра-таймға ұласып, жарты сағат ішінде гол салынбады. Пенальти сериясында Италия құрамасы Испанияны қапы қалдырып, ақтық сынға шықты.
Ал Англия – Дания кездесуінде фавориттер ағылшындықтар болғанымен, есепті бірінші болып қонақтар ашты. Қақпадан алыс жерде айып добы белгіленіп, 30-минутта Миккель Дамсгордың соққысы нысанаға дәл тиді. Алайда дат ойыншыларының қуанышы көпке созылмады. Араға 9 минут салып Симон Кьер өз қақпасына гол салып алды. Бұдан соң қосымша тайм белгіленіп, матч тізгінін Англияның аяқдопшылары алды. Нәтижесінде Рахим Стерлинг қарсылас қақпасының айып алаңына кіріп, құлады. Бас төреші бірден пенальти берді. 11 метрден айып добын соққан Хари Кейн алғашқыда мүлт кетсе де, қақпашыдан кейін серпілген допты нысанаға дәл дарытты. Осылайша ағылшындықтар өз тарихында алғаш рет кәріқұрлық додасының финалына жолдама алды.
Аманжол НҰРТАЗИН,
“Soltüstık Qazaqstan”.