Soltüstık Казахстан
Ауыл әкімдерінің сайлауалды үгіт-насихат шаралары жалғасуда. Бұл туралы облыстық сайлау комиссиясы төрағасының орынбасары Сергей Калинин хабарлады.
Сергей Васильевич берген мәліметтер бойынша өңірде барлығы 13 аудан, төрт аудандық маңызы бар қала және 190 ауылдық округ болса, 25 шілде күні 70 ауылдық округ пен аудандық маңызы бар бір қала тұрғындары дауыс беріп, өз таңдауларын жасайды. Сайлау төрт жылдық өкілеттік мерзімі бітетін және өз мансабын мерзімінен бұрын аяқтаған ауылдық округтердің әкімдері арасында өтеді.
“Егер ауылдық округ әкімінің мерзімі аяқталса немесе ол жұмыстан кетуді ұйғарса, онда бір ай ішінде сайлау комиссиясы осы ауылдық округ әкімінің сайлауын ұйымдастырады”, – дейді Сергей Калинин. Саяси науқанды 218 елді мекенде өткізу белгіленіп,174 учаскелік сайлау комиссиясы құрылған.
Ауылдық округ әкімдерінің қызметіне кандидаттарды ұсыну 26 маусымнан басталды. 225 адам үміткер болуға ниетті. Олардың 58-і – “Nur Otan”, үшеуі – “Ауыл”, екеуі – “Ақ жол”, үшеуі – “Адал”, бесеуі – Қазақстанның халық партиясынан, қалғандары – өзін-өзі ұсынғандар.
Алғаш рет ұйымдастырылып отырған сайлаудың өзіндік ерекшеліктері жоқ емес. Мәселен, кандидат тіркелу үшін округтегі сайлаушылар дауысының кемі 1 пайыз қолдауына ие болу керек. Сондай-ақ тіркеудің аяқталу кезеңінде тізімде бір ғана үміткер болса, сайлауды баламалы негізде өткізу міндет. Бұл жағдайда аудан әкімі тағы екі өкіл ұсынуға құқылы. Жеңіске жету үшін ең көп дауыс жинаса жеткілікті. Додаға үш үміткер қосылса қайсысы сайлаушылар сеніміне ие болса, ол ауылдық округтің әкімі болып сайланады.
Әрбір үміткердің сайлауалды бағдарламасын жасауға және ұсынуға 220 мың теңгеден бөлінеді. Бұл мақсат үшін республикалық бюджеттен 190 миллион теңге қарастырылған. Бұл қаражаттың 70 пайызы сайлау комиссиясы мүшелерінің еңбекақысына төленеді.
Өмір ЕСҚАЛИ,
“Soltüstık Qazaqstan”.