Soltüstık Казахстан
Облыс орталығында тағамға қосатын түрлі аскөктер өсіру бойынша шеберлік сағаты өтті. Тегін оқыту шарасын “Green help” қоғамдық бірлестігі ұйымдастырды.
Өңірімізде адам ағзасына аса қажет дәрумендер, аминқышқылдары мен микро және макроэлементтерге бай аскөктерді өсіретіндердің қатары қалың. Көкөністің бұл түрін қаладағы ірі сауда үйлерінен сатып алуға немесе үй жағдайында өсіруге де болады.
– Шеберлік сыныбын USAID ұйымының гранты аясында іске асырып жатырмыз. Кез келген өңір тұрғыны әлеуметтік желілер арқылы біздің тегін курсымызға жазылып, аскөкті үй жағдайында өсірудің қыр-сырын меңгере алады. Алғашқы сабақ барысында дәріс тыңдаушыларға қажетті құрылғылар мен тұқым береміз. Бір аптадан соң олар қайта келіп, бізге өздері өсірген өскіндерді көрсетеді, – деді “Green help” қоғамдық бірлестігінің жетекшісі Қайыржан Айсин.
Бұл кәсіп түрін жыл соңына дейін 300-ге жуық адамға үйрету көзделуде. Аскөк өсірумен айналысуды көздегендердің арасында төрт баланың анасы Анаргүл Баймолдина да бар.
– Мен тапсырыс бойынша тәтті тоқаштар, салаттар әзірлеймін. Аскөк өсіріп үйренсем, тағамдарым тіпті пайдалы әрі көрікті бола түсер еді, – деп қуанышымен бөлісті жерлесіміз.
Шеберлік сағатын өткізу үшін бұл салада 30 жылдық еңбек өтілі бар Татьяна Дмитриева арнайы шақыртылған. Екі күндік оқуды тамамдаған жандар арнайы сертификатқа ие болады.
Гүлмира ШОҚТЫБАЕВА,
“Soltüstık Qazaqstan”.