Soltüstık Казахстан
Бүгінде облыс орталығы көркейіп, жаңадан салынған зәулім ғимараттар мен тұрғын үйлер қалаға сән беруде. Петропавл қаласының ішкі жолдарын жөндеу, көшелерді жарықтандыру мен тегін автотұрақтар, балалар ойын алаңдарын салу да назардан тыс қалған емес. Мәселен, қалалық әкімдік өкілдері үстіміздегі жылдың шілде айынан бастап шаһарда балалар ойын алаңдарын жөндеу қолға алынғанын айтты. Биыл осындай 60 ойын алаңын орнату жоспарлануда. Бұл жұмыстар жаз маусымының соңына дейін аяқталуы тиіс.
Балалар ойын алаңдарының қауіпсіздігі – ең маңызды мәселе. Сондықтан балалардың денсаулығына қауіп төндірмеуі үшін алаңдарға жұмсақ жабындылар төселуде. Сырғанақ пен әткеншектер, секіргіштер орнатылып, арнайы ққұм салынған қораптар жасалады. Осындай балалар ойын алаңын Ғабит Мүсірепов көшесі, 4 мекенжайындағы тұрғындар көптеп армандаған болатын. Бұл үйде көпбалалы және жас отбасылар тұрады. Ойын алаңының жоқтығынан осы уақытқа дейін балалар көрші аулаларда ойнауға мәжбүр болған. Қазір балалардың қуанышында шек жоқ. Олар бір ауыздан ойын алаңында барлық жағдай жасалғанын, қажетті жабдықтар орнатылғанын, түрлі-түстермен безендірілгенін қуанышпен жеткізді.
Ақмарал ЕСДӘУЛЕТОВА,
“Soltüstık Qazaqstan”.