Soltüstık Казахстан
Токиодағы жазғы Олимпиада ойындарына Қазақстаннан 97 спортшы қатысып жатыр. Олардың қатарында 4 жерлесіміз бар. Өкінішке қарай, үшеуі жүлдегер атанарлықтай қауқар көрсете алмай, жанкүйерлерін жабырқатты.
Солтүстікқазақстандықтардың арасынан бірінші болып додаға Алексей Луценко түскен болатын. Командалық веложарыста жерлесіміз 21-ші орынға тұрақтады. 234 шақырымдық қашықтықты ол 6 сағат 11 минут 46 секундта бағындырды. Шілденің 28-і күні жекелей сында да жергілікті велошабандоз сенімді ақтай алмады, мәре сызығын 32-ші болып кесті.
Үш қарғып секіруде ел намысын Олимпиада чемпионы Ольга Рыпаковамен қатар жерлесіміз Ирина Эктова да қорғады. Төрт жылда бір рет келетін аламан бәйгеде қызылжарлық спортшы ақтық сынға өте алмады. Құрамадағы жалғыз депутат (Солтүстік Қазақсан облыстық мәслихатының депутаты) 14 метр 40 сантиметр ұзындыққа секіріп, 31-ші нәтиже көрсетті.
Михаил Литвин 400 метр жүгіруден сынға түскен. Бұл қашықтықты ол 47,15 секунд ішінде жүгіріп өтті. Бұл нәтиже оған жартылай финалға шығуға мүмкіндік бермеді. Велотректен жарыстар әлі басталған жоқ. Бұл сында тағы бір жерлесіміз Артем Захаров бақ сынайды.
Аманжол НҰРТАЗИН,
“Soltüstık Qazaqstan”.