Ел болашағы — білімді ұрпақ

Soltüstık Казахстан

 Kyzylzhar_akparat@mail.ru

Мемлекет басшысы Қасым-Жомарт Тоқаев Қазақстан хал­қына арнаған “Халық бірлігі және жүйелі реформалар – ел өр­кен­деуінің берік негізі” атты Жолдауында бүкіл әлемді алаң­датып отырған пандемиямен күрес жолдарын, оның елімізге алып келген зардабын айта келе, еліміздің әлеу­меттік дамуына, ел тұрғындарының табысы мен жұ­мыс орындарын сақтауға, халқымыздың денсаулығын сақтауға басты назар аударды.

Президентіміздің Жолдауы елі­міздің болашағы мен ертеңгі күнге бетбұрысын айқындап берді. Бар­лық саланың дамуы ел тағдыры үшін маңызды. Әр азаматтың көкейінде жүрген мәселені ше­шуге арналған стратегиялық құ­жат алдағы өмірде бірқатар жа­ңашылдықтар орын алатынына шүбәсіз сендірді.

Қандай заман, қай қоғам бол­масын білім алуды ешқашан шетке ысырып қойған емес. Қазір білімді жастардың дәурені жүріп тұрған кез. Жас буынға білім беру жолында еңбек етіп жүргендіктен бұл салада болып жатқан барлық өзгерістер мен жаңалықтар менің жаныма жақын. Президентіміз білім беру жүйесіне жігерлі әрі бі­лікті мамандар қажет екенін атап өтті. Алдағы уақытта мұғалімдер қазіргідей 5 жылда емес, 3 жылда бір рет қайта даярлықтан өтетін болады. Бұл өз кезегінде ұстаз­дардың білім, білігін арттырады. Өйткені қазіргі заман талабы жаңаша оқытуды көздейді. Ал біз­дерге жүктелген міндет зор. Бұл ретте, ұстаздардың курстан өту үшін өз қалтасынан ақша төлеуіне жол берілмейтіні көңілге медеу болды.

Әрбір бүлдіршін мектепке дейінгі оқу-тәрбиемен қамтылуы тиіс. Балабақшалар мен мектепке дейінгі білім беру орындарының санын көбейту қажет. Өйткені білімді ұрпақ – ел болашағы. Пре­зидентіміз жылдағы Жолдауда атап айтқан тағы бір мәселе – ұстаздардың еңбекақысы. Қаңтар айында ұстаз­дардың еңбекақысы 25 пайызға өсті. Мұғалім ретінде мемлекет тарапынан жасалып отырған әрбір көмек бізді жігерлендіретінін айтқым келеді.

Қазіргідей жаңарған заманда еліміздің әрбір азаматы жоғары білім мен табанды ең­бектің арқасында ғана биік белес­терден көрінеді. Баршамыз Тә­уелсіз елдің баянды болашағы үшін жұмыла жұмыс істеуге тиіс­піз.

Алданыш НҰРАХМЕТҰЛЫ,

Дәуқара орта мектебінің мұғалімі.

Айыртау ауданы.