Soltüstık Казахстан
Патрульдік полиция батальонының қызметкері Александр Авдонин – қазақ тілін жетік біледі. Жақында Қазақстан халқы тілдері күніне арналған салтанатты шарада өңір басшысының Алғыс хатымен марапатталды.
Полиция кіші лейтенанты жұмыс барысында адамдармен қазақ тілінде еркін сөйлеседі, құжаттарды да мемлекеттік тілде сауатты толтырады. Сондай-ақ ол полиция ведомствосындағы ішкі және сыртқы коммуникациялар бөлімі өткізетін іс-шаралардың ұдайы қатысушысы. Аталмыш бөлім мамандары мемлекеттік тілді үйрету сабақтарын, сайыстар мен флешмобтар және т.б. шараларды жиі ұйымдастырады, облыс, республика көлемінде өткізілетін байқауларға да қатысады. Александр Авдонин – “Мен қазақша сөйлеймін” республикалық байқауының қатысушысы. Аталған сайыстың төртінші кезеңіне құқық қорғау органдарының қызметкерлері қатысты. Қатысушылар қазақ ақындарының Отан, туған жер, қазақ тілі тақырыптарында жазған өлеңдерінен үзінділер оқып, бейнетаспаға түсірді. Александр Авдониннің бейнеролигі “Instagram” желісінде 1400 рет қаралып, 400-дей лайк жинаған.
– Мемлекеттік тілді білу – мемлекеттік қызметші үшін негізгі талап болуы тиіс. Тіл білу өмірде де, жұмыста да көмектеседі, қатынасатын ортаң кеңейеді. Қазақ тілінде ауызекі сөйлеуді бала кезімнен білемін, енді әдеби тілді үйренгім келеді, – дейді Александр Авдонин.
Юрий КЛЫКОВ,
облыстық полиция департаменті ішкі және сыртқы коммуникациялар бөлімінің инспекторы.