Soltüstık Казахстан
Елімізде мемлекеттік сатып алу рәсімдерін сыбайлас жемқорлық тәуекелдерін төмендету, мемлекеттік сатып алуға қатысушылардың жауапкершілігін арттыру әлі жетілдіруді қажет етеді. Қазіргі экономикалық жағдайда мемлекеттік сатып алу жүйесінде экономиканы сауықтыру, қаржылық ресурстарды басқару процесінің алатын орны айрықша. Былайша айтқанда, экономикалық реттеуде, оны тұрақтандыруда материалдық, еңбек ресурстық, ғылыми және өнеркәсіптік әлеуеттерді шоғырландырудағы рөлі зор. Осы себепті жыл өткен сайын конкурс талаптары барынша жеңілдетіліп, өткізу кезеңдерін қысқартуға, сондай-ақ тапсырыс беруші тарапынан ықтимал теріс әрекеттерді болдырмауға барынша назар аударылып отыр.
Мемлекеттік сатып алу шараларын жетілдіру, сатып алу процестерінің ашықтығы мен қолжетімділігін қамтамасыз ету жөніндегі жаңа тетіктерді Қаржы министрлігі жанындағы мемлекеттік сатып алудың орталықтандырылған органы жүзеге асырып, құқықтық және техникалық, сондай-ақ мемлекеттік сатып алу веб-порталына қолжетімділікті қамтамасыз етеді. Мұның өзі орталықтандырылған сатып алу рәсімдерінің қолжетімділігімен қатар сыбайлас жемқорлық қылмыстарын азайтуға, “бармақ басты, көз қысты” әрекеттерді болдырмауға, тапсырыс беруші мен сатып алу ісіне бақылауды күшейтуге мүмкіндік береді.
Мемлекеттік сатып алу жүйесінің ашықтығын одан әрі арттыру және жетілдіру жөнінде атқарылған жүйелі жұмыстардың арқасында биыл 14 автомобиль көлігін жалға алу, 25 әкімшілік ғимаратқа қызмет көрсету, 19 нысанды күзету келісімшарттары жасалып, нәтижесінде 29 299,7 мың теңге үнемделді. 826,6 мың теңгеге жылыту қазандығы, өрт сөндіру, кондиционер құралдары сатып алынды.
Дамир ТЕМІРҒАЛИ,
мемлекеттік мүлік және жекешелендіру департаменті мемлекеттік сатып алу және активтерді басқару бөлімінің бас маманы.