Soltüstık Казахстан
Солтүстік Қазақстан облысында өнім қауіпсіздігінің мониторингі аясында 174 сауда нысанынан 2119 тауар сынамасы алынып, зерттелді, оның 372-сі гигиеналық нормативтер мен техникалық регламенттер талаптарына сәйкес келмеді, деп хабарлайды ҚазАқпарат тілшісі.
СҚО санитариялық-эпидемиологиялық бақылау департаменті баспасөз қызметінің мәліметінше, ведомство өнім қауіпсіздігінің мониторингі аясында ай сайын азық-түлік және азық-түлік емес тауарлардың сапасын тексереді.
Алынған өнімдердің сынамасы «Ұлттық сараптама орталығының» аккредиттелген зертханаларында зерттеледі.
«8 айдың ішінде облыстың аумақтық санитариялық-эпидемиологиялық бақылау басқармалары 174 сауда нысанын тексерді. Олардын 2119 сынама алынды және зерттелді, нәтижесінде 372 үлгі – 17,56 %-ы гигиеналық нормативтер мен техникалық регламенттер талаптарына сәйкес келмеді. Оның ішінде 1321 сынама азық-түліктен алынды, 234-і – 17,71 %-ы сәйкес келмеді. Азық-түлік емес санаттағы 798 сынаманың 138-і – 17,29 %-ы талапқа сай болмай шықты», – дейді СҚО санитариялық-эпидемиологиялық бақылау департаментінің техникалық регламенттердің талаптарын бақылау бөлімінің басшысы Данияр Оспанов.
Азық-түлік ішінде талапқа сәйкес келмеген өнімдердің ең көп үлесі – балық және балық өнімдеріне тиесілі – 48,57 %. Құс еті, құс өнімдерінің 34,75 %-ы, ет және ет өнімдерінің 21,25 %-ы нормативке сай болмаған.
«Азық-түлік емес өнімдердің ішінде 50 % жеңіл өнеркәсіп өнімі, 37,5 % балалар ойыншықтары, 7,33 % парфюмерлік-косметикалық, ауыз қуысы гигиенасы құралдары сәйкес келмеген. Азық-түлікке қатысты өндірушілер негізінен таңбалау талаптарын бұзған, бұл – 75,5 %-ды алады. Физика-химиялық көрсеткіштер бойынша – 16,6 %, микробиологиялық көрсеткіштер бойынша 3,2 %, таңбалауда мәлімделген өнімге сәйкессіздік, яғни тұтынушыны алдау немесе жаңылыстыру – 2,1%, қауіпсіздік көрсеткіштері бойынша 1,3 %, өзге көрсеткіштер бойынша 1,3 %. Қолданыстағы заңнама бойынша, сауда орындарына анықталған талапқа сай келмейтін өнімдер бойынша нұсқама берілді», – дейді бөлім басшысы.
Сондай-ақ, департамент мамандары маусым-тамыз айлары аралығында зертханаға бақша дақылдарының 22 сынамасы жеткізген, олардың барлығы талапқа сай сапалы болып шықты.
«ҚР ДСМ Санитариялық-эпидемиологиялық бақылау комитетінің сайтында http://reestr-np.kz/rus/ «Сәйкес келмейтін өнімдер тізілімі» орналастырылған, онда әрбір тұтынушы, өткізуші, өндіруші техникалық регламенттердің талаптарына сәйкес келмейтін тауарлардың атауларын, сондай-ақ оларды кім өндіргенін, олар қандай сауда нысандарында сатылғанын көре алады. Бұл тізім ай сайын өнім қауіпсіздігі мониторингінің қорытындысы бойынша толықтырылып отырады», – дейді Данияр Оспанов.
https://www.inform.kz/