Soltüstık Казахстан
Қызылжар ауданында кей шенеуніктер бюджеттік бағдарламаларды жоспарлау мен орындауда жеке бастың жауапкершілігі мен адалдығын танытудың орнына бюджеттік және өзге де заңнамаларды өрескел бұзуды әдетке айналдырған сияқты. Облыстық тексеру комиссиясының аудиторлары сәуір айында экономика және қаржы бөлімін тексеріп, біраз былықтың бетін ашты. 2020 жылы үнемделген “артық ақшаны” бөлімдегі он қызметкер тегін олжадай көріп, өзара бөліске салған. “Сыйақы” мөлшері 60,5 млн. теңгеге дейін шарықтап, әрқайсысы 6 млн. теңгені қалтаға салған. Былайша айтқанда, ай сайын 504 мың теңгені шырт түкіріп, санап алып отырған.
Орын алған осы келеңсіз жайтқа байланысты облыстық тексеру комиссиясының төрағасы Тілеген Каскин “2020 жылға арналған жекелеген жергілікті бюджеттерді жоспарлау және орындау, аумақтық дамыту бағдарламасын іске қосу, сондай-ақ мемлекет активтерін пайдалану тиімділігін мемлекеттік аудит бойынша жүргізілген тексеру іс-шарасының қорытындылары туралы” қаулы шығарып, Қызылжар аудандық экономика және қаржы бөлімінде анықталған кемшіліктерді жою, мамандардың жауапкершілігін қарау нұсқамасын тиісті органдарға жіберген.
Аудандық әкімдік қандай пәрменді шара қолданды дейсіз ғой. Атынан ат үркетін тексеру комиссиясының таудай ісінің аяғын қылдай етіп жіберген. Қаржы және бюджеттік саясат секторының бас мамандары Д.Жағыпарова мен А.Сыздықовты сөгіс беру түріндегі тәртіптік жауапкершілікке тарту жазасымен шектелген. Бір тықырдың таянғанын сезді ме екен, бөлім бастығы С.Қасенова жұмыстан өз еркімен кеткен. Оған қосымша сыйақыға заңсыз төленген 60,5 млн. теңгені өндіріп алу бойынша жүктелген міндет орындалмаған күйі қалған.
Осы жерде жоғарыдағы қос маман “қосақ арасына” қыстырылып, жазықсыз құрбандыққа шалынды ма, әлде оның астарында әйтеуір біреуді жазалау керек деген шығарыпсалма жауап жатқан жоқ па деген сұрақ туындайды. Өйткені бюджеттік комиссияның төрағасы – аудан әкімі. Оның шешімінсіз бір тиынның да шашау шықпайтыны белгілі. Жалақы қоры есебінен үнемделген қаражаттың орынсыз жұмсалуына аудандық мәслихат кінәлі, өйткені бюджеттік жоспарлау депутаттардың қолдауымен бекітілді деген пікірлерді мәслихат хатшысы Жанат Елеусізов жоққа шығарды. Оның айтуынша, сессияда қаражат салалық бағдарламалар мен бөлімдер бойынша ғана бекітіледі. Одан әрі қарайғы бөлінісіне бюджеттік комиссия төрағасы жауап береді.
Арада жарты жылға жуық уақыт өтсе де, заң орындары неге қозғалыссыз жатыр деген оймен Қызылжар ауданының прокуроры Қайрат Ермекбаймен хабарластық. Ол істің сыбайлас жемқорлыққа қарсы іс-қимыл департаментіне жіберілгенін, ал осы ведомство басшысының бірінші орынбасары Нұрлан Жахин тергеу жұмыстары жалғасып жатқанын жеткізді. Облыс прокурорының көмекшісі Жарқын Жұмабек те осы сарында жауап берді. Облыстық соттың баспасөз хатшысы Динара Төлеңгітовадан материалдардың әлі сот қарауына түспегенін білдік.
Бізге осы мәселенің жазылуына түрткі болып, жай-жапсарын айтып берген газет оқырманының “іс бітті, қу кетті” болып кетпей ме деген күдігі расқа айнала ма, әлде он мемлекеттік қызметкердің бюджет қаржысын “жегені” желкесінен шыға ма? Оны уақыт көрсетер.
Өмір ЕСҚАЛИ,
“Soltüstık Qazaqstan”.