Soltüstık Казахстан
“Nur Otan” партиясы депутаттық фракциясының мүшелері “Өзгерістер жолы: әр адамға – лайықты өмір!” сайлауалды бағдарламасын жүзеге асыру бойынша қабылданған жол картасының орындалу барысын талқылады. Облыстың, аудандар мен Петропавл қаласының 1134 бөлімнен тұратын 5 жылдық даму жоспары жасалған болатын. Онда қамтылған барлық іс-шаралар қоғамдық кеңестер мен депутаттық корпустың тұрақты бақылауына алынып, жүзеге асырылу барысы ұдайы назарда.
2021-2025 жылдарға арналған облысты дамытудың жол картасында 7 бағыт бойынша 129 іс-шара жоспарланса, осы кезге дейін 17 пайызы орындалды, 64 пайызы орындалу үстінде. Атап айтқанда, “Qyzyljar” еркін экономикалық аймағында “CLAAS” ауыл шаруашылығы техникасын құрастыру, электр техникалық зауыт ашу жұмыстары атқарылып, 210 орындық заманауи жұқпалы аурулар ауруханасы және қуаты 2,1 мың тонналық көтерме-тарату орталығы пайдалануға берілді. “QYZYLJAR art centre” бірегей мәдени орталығы бой көтеріп, “Маслодел” ЖШС-нің өндірістік желісі кеңейтілді. Ақжар ауданында диірмен, Шал ақын ауданында Құлеке батыр атындағы дене шынықтыру-сауықтыру кешені ашылды. Айыртау және Ғабит Мүсірепов атындағы аудандарда тауарлы-сүт фермалары, Қызылжар ауданында кірпіш зауыты салынуда.
Жиында білім беру, тұрғын үй құрылысы, жолдарды жөндеу, жылу, ауызсу желілерін таруға қатысты атқарылатын істер де айтылды. Инклюзивті білім беруді дамыту мәселесі туралы білім басқармасы басшысының орынбасары Елена Гонтарьдың есебі тыңдалды. Оның айтуынша, облыста ерекше білім беру қажеттілігі бар 0-18 жас аралығындағы 4 мыңнан астам бала бар, олардың 1152-і – мүгедек. 1307 бала мектепке дейінгі ұйымдарда, арнайы және жалпы білім беретін мектептерде оқиды. 26 арнайы білім беру ұйымы, оның ішінде 7 арнайы мектеп-интернат, 3 психологиялық-медициналық-педагогикалық кеңес беру, 15 психологиялық-педагогикалық түзету кабинеті, “Асыл мирас” аутизм орталығы, №40, №2, №27 мектептерде ресурстық кабинеттер жұмыс істейді. №21, №8, №23 мектептерде “Болашақ” корпоративтік қайырымдылық қорымен бірлесіп инклюзивті оқытуды қолдау кабинеттері орналасқан. Депутаттық фракция мүшелері бұл бағытта атқарылған жұмыстарды әлі де ширата түсу қажеттігін айтты.
“Еңбек” мемлекеттік бағдарламасын жүзеге асыру жайы да назардан тыс қалмады. Биыл бұл салаға республикалық бюджеттен 1,939 млдр. теңге бөлінген. “Қазіргі уақытта аудандарға көшіп келушілерге берілетін 242 үйді сатып алуға дайындық шаралары жүргізілуде. Бір баспананың құны 8 млн. теңгені құрайды”, – деді облыстық мәслихаттағы “Nur Otan” депутаттық фракциясының жетекшісі Әсем Рахметова.
Ілияс СӘБДИНОВ,
“Nur Otan” партиясы облыстық филиалының баспасөз хатшысы.