Soltüstık Казахстан
Қызылорда облысының Жаңақорған ауданында ұлттық ат спорты түрлерінен ел чемпионаты өтті. 2000-2003 жылдары туған жастар арасындағы жарыста екі жерлесіміз жүлдегер атанды.
Аламанға ұлттық спорт десе ішер асын жерге қоятын нағыз сайыпқырандар қатысты. Өңір намысын “Арғымақ” ұлттық ат спорты клубының мүшелері қорғады. Виктор Тимофеев аударыспақтан үздік атанды. Ол 85 килограмнан жоғары салмақта өнер көрсетіп, ақтық сында түркістандық Ғабит Ағабектен басым түсіп, алтыннан алқа тағынды.
52 килограмм салмақ дәрежесінде 9 спортшының ішінен финалға түркістандық Алтынбек Жарас пен солтүстікқазақстандық Рамазан Сәлім шықты. Өкінішке қарай, тартысқа толы жекпе-жекте “Арғымақ” клубының өкілі жеңіліп, күміс медальді місе тұтты. Қос спортшының жаттықтырушысы Санат Есмағұловтың айтуынша, жарыс жоғары деңгейде өтті.
– Облыста аударыспақ спорты қанатын кеңге жайып келеді. Спортшылардың деңгейі жылдан-жылға өсуде. Оған дәлел, Виктор мен Рамазанның биылғы маусымда жеткен жетістіктері. Қос спортшы шілде айында “Ұлы дала рухы” фестиваліне де қатысып, күміс жүлдегер атанған болатын. Осы жолы да жақсы өнер көрсетті, – дейді Санат Серікұлы.
СУРЕТТЕ: В.Тимофеев пен Р.Сәлім бапкерлері Санат Есмағұловпен бірге.