Soltüstık Казахстан
Тәуелсіздіктің 30 жылдығына орай “Абылай хан резиденциясы” музей-кешенінде “XVIII ғасырдағы қазақ батырлары” атты конференция өтті.
Ел тарихын, ұлт шежіресі мен құндылықтарын сақтау мен дәріптеу, өскелең ұрпақтың Ұлы Дала кеңістігін ғасырлар бойы жаудан қорғаған батырлардың ерлік істерін насихаттау мақсатында өткен іс-шараға аға ұрпақ өкілдері, еңбек ардагерлері, жергілікті ғалымдар мен жастар қатысты. Қатысушылардың кейбірі конференцияға ZOOM платформасы арқылы қосылды.
Шара барысында “Абылай хан резиденциясы” музей-кешенінің директоры Аян Садаев конференцияның мән-маңызына тоқталып, қазақ тарихында қол бастаған батырлар мен ерліктің шыңына ту тіккен қаһармандардың орны ерекше екенін атап өтті. Солтүстік Қазақстан облыстық мемлекеттік архивінің директоры, тарих ғылымдарының кандидаты Сәуле Мәлікова Құлсары батыр жайында әңгіме өрбітті.
– Абылай хан дәуірінде өмір сүрген белгілі мемлекет қайраткері, Орта жүздің батыры, әулие Құлсарының атқарған қызметі Ресей мұрағаттарындағы құжаттар негізінде анықталды. ХҮІІІ ғасырдың құжаттарында Құлсары әулиенің есімі ықпалды батыр мен мемлекет қайраткері ретінде көрсетіледі. Құжаттарда Құлсары батыр көршілес мемлекеттермен тату көршілік қарым-қатынас орнатудың жақтаушысы ретінде аталады. Өзін тығырықтан жол таба білер тапқыр дипломат ретінде таныта білген Құлсары 30 жылдан астам Қазақ хандығын бекіту жолында аянбай еңбек етіп, оның ішкі, сыртқы саяси өміріне белсенді араласып отырды, – деді Сәуле Зейноллақызы. Жиында Қожаберген жырау, Баян, Сары, Құлеке, Жанатай батырлар мен тағы басқа да тарихи тұлғалардың есімдері ерекше аталды. Республикалық “Egemen Qazaqstan” газетінің өңірдегі меншікті тілшісі Жақсыбай Самрат Абылай ханның өміріне тоқталып, сол заманда шыққан дастандар мен жырлар, музыкалық шығармалардың бәрі оның батырлық іс-әрекеттерін суреттейтінін, саяси сахнаға шығуының өзі оның батырлығымен тікелей байланысты екенін жеткізді. Конференцияда профессор, медицина ғылымдарының докторы Жанбатыр Сартаев, тарих ғылымдарының кандидаты, М.Қозыбаев атындағы Солтүстік Қазақстан университетінің оқытушысы Анатолий Плешаков пен тағы басқа зиялы қауым өкілдері өз ойларын ортаға салды.
Гүлнәр ЖҰМАБЕКОВА,
“Абылай хан резиденциясы” музей-кешенінің қызметкері.