Soltüstık Казахстан
“Nur Otan” партиясы облыстық филиалының жанындағы білім мен ғылымды дамыту жөніндегі қоғамдық кеңес мүшелері мектептерге жүргізілген мониторинг қорытындыларын шығарды.
Білім саласындағы сапаны қамтамасыз ету департаменті 462 мектепке тексеру шараларын ұйымдастырып, 34 бастауыш және негізгі шағын жинақты мектепте тамақтану нысандары жоғын, 83 білім ошағында оқушыларды ыстық тамақпен қамтамасыз ету келісімшарттары жасалмағанын анықтады. Балалар санының аздығына және аудан орталығынан алыстығына байланысты кәсіпкерлер ыстық тамақпен қамтамасыз етуге ниет білдіре бермейді екен.
– 70 білім беру ұйымының тамақтану орындары санитарлық талаптарға сәйкес келетіні жөнінде қорытындылар ұсынылмаған. Бір мезгіл ыстық тамақ ұйымдастыруға жеке кәсіп иелері құлықсыз. Олардың жиі ауысуы да іске белгілі дәрежеде кедергі келтіреді, – деді қоғамдық кеңес мүшелері алдында сөз сөйлеген облыстық білім беру саласындағы сапаны қамтамасыз ету департаментінің басшысы Айнагүл Сұрағанова.
Барлық орта мектептерде компьютерлік сыныптар мен компьютерлер жеткілікті болғанымен, кейбірінде интернетке қосылу жылдамдығы өте төмен.
Білім мен ғылымды дамыту жөніндегі кеңес мүшелері жауапты ведомство басшыларына мониторинг барысында анықталған кемшіліктерді жоюды ұсынды.
Ілияс СӘБДИНОВ,
“Nur Otan” партиясы облыстық филиалының баспасөз хатшысы.⠀