Soltüstık Казахстан
Жақсы мұғалімнің тәрбиесін көрген біз өзімізді шын мәнінде бақытты сезінеміз, болашағымыздың жарқын боларына сенеміз. 11 жыл бойы білім алған Озерный орта мектебінің білімді де білікті ұстаздары жайлы айтарымыз көп, алғысымыз шексіз.
Мектеп табалдырығын алғаш аттаған кезде Орынтай Кәрімова апайдың күлімсіреп, жылы жүзбен қарсы алғаны, аса ыждаhаттылықпен білмегенімізді үйреткені әлі есімізде. 3 және 4 сыныптарда Сәуле Белгібаева апай білім негізі бастауышта екенін санамызға сіңіре білді. Ақжарқын кейпімен сыныпқа кіріп келгенде айнала жылы шуаққа бөленіп қоя беретін. 5-сыныпта өзі шебер, өзі сұлу Арайлым Асқарқызы сурет салудың қыр-сырына үйретті әрі сынып жетекшіміз болды. Гауһар Зейноллақызы ағылшын тілінен сауатымызды ашты. Гулмия Амангелдіқызының биология, химия сабақтары қызықты өтетін. Информатика әлемімен Орынтай Хабиболлақызы таныстырса, Саян Құрманбаев математика, физика, алгебрадан есеп шығаруды үйретті. Өзін-өзі тану пәнінің мұғалімі Галия Омарованың сабағын тағатсыздана күтетінбіз.
Бастауыш сынып мұғалімі Бөтагөз Белгібаева, тарихшы әрі географ Гүлзат Есімова, қолөнерге баулыған Айгүл Аушахметова, тағы басқаларының есімдерін ерекше мақтанышпен атаймыз. Қазіргі сынып жетекшіміз Шолпан Рамазанқызы ешқайсымызды бөліп-жармай өз баласындай көреді. Ал дене шынықтыру пәнінің мұғалімдері Қанат Құдияров пен Қуанышбек Есімов ағайлар үнемі сабақтан тыс уақытта спорт үйірмелеріне қатысуға үгіттеп жүргені. Ақ жолдан адастырмаған аяулы ұстаздарымызды төл мерекемен шын жүректен құттықтаймыз. Зор денсаулық тілейміз.
Жарқынай ӘШІМОВА, Айшабибі ТОҚТАРОВА, Ринат ИДИЯТОВ, 11-сынып оқушылары.
Уәлиханов ауданы.