Soltüstık Казахстан
Әлемдік мәдениетте адамзаттың ыждаһаттылықпен жинақтап, қастерлеп сақтаған құндылықтарын жастарға насихаттай отырып, келушілердің бос уақытын қызықты өткізетін орын – музей екені даусыз. Нағыз тарихи айғақтардан тұратын мекеме ретінде танылған мәдени ошақты бұқараға таныстыру міндеті экскурсия жүргізушілерінің мойнына жүктеледі. Бұл мамандық иелері адамның рухани байлығы мен тарихи білімін қалыптастыру жолында жұмыс жасауы қажет. Жастардың музей өмірімен етене танысулары әрі экскурсия жүргізушілерінің жұмысына қанығулары үшін жуырда “Абылай хан резиденциясы” музей-кешені жанынан “Жас экскурсия жүргізуші” атты үйірме ашылған болатын.
Музейдегі экскурсия жүргізушілері – өскелең ұрпақтың өз халқының тарихын, мәдениетін зердесіне түйген отаншыл азамат ретінде қалыптасуы үшін еңбек сіңіреді, алыс-жақын шетелден келген қонақтарға қазақ халқының тарихы сонау сақ заманынан бастау алғанын, ата-бабаларымыздан жеткен құнды мұралар қазақ халқының тарихын дәріптейтінін айтады. Экскурсия жүргізушісі – жан-жақтылықты және зерделікті талап ететін шығармашылық мамандық. Мұражайда экскурсияны дайындау және өткізу оңай шаруа емес. Жастарға бұл кәсіпті мектеп қабырғасында жүріп-ақ меңгеруге болады. Ол үшін білім мен табандылық қажет. Сөзге шешендік, дәлдік әрі терең ойлылық та экскурсия жүргізушілеріне керек қасиет.
“Абылай хан резиденциясы” музей-кешені жанындағы “Жас экскурсия жүргізушісі” үйірмесі өткен жылдың қараша айынан бастап жұмыс істеп келеді. Аз уақыттың ішінде үйірмеміздің мүшесі атансам деген оқушылар қатары аз емес. Олар тегін ұйымдастырылатын сабақтарға қатысуда. Болашақта өз өмірлерін мұражаймен байланыстырғысы келетіндер де бар.
Бүгінгі таңда жас экскурсоводтарымыз “Музейлер тарихы”, “Музей түрлері”, “Экскурсияның мәні”, “Экскурсияның мақсаттары мен міндеттері”, “Экскурсия түрлері”, “Экскурсияны өткізу ерекшеліктері”, “Экскурсоводтың сөйлеу мәдениеті” тақырыптарында мәдениет ордасына бас сұққан кез келген қонаққа экскурсия жүргізе алады. Биылғы оқу жылының соңында үйірме қатысушылары өз ата-аналарына, сыныптастарына, қала тұрғындарына арнап арнайы экскурсия өткізуді жоспарлап отыр.
Назгүл БЕЙСЕМБИНА,
“Абылай хан резиденциясы” музей-кешенінің жоғары санатты экскурсия жүргізушісі.