Soltüstık Казахстан
Сөзге – шебер, іске – ұста халқымыздың мәдениетін паш ететін құндылықтарының бірі – қолөнер. Асыл тастан сән бұйымын жасап, қазақ ұлттық киімдерінің етек-жеңіне оқа тігіп, жақтауына кесте жүргізіп, сүйек пен мүйізді қиыстырған халық шеберлерінің ісі мақтауға тұрарлық. Саусағынан өнер тамған шеберлерде қазіргідей тігін машинасы болмаған. Десе де қазақ әйелдері киім-кешек пен көрпе-жастық, тұскиіз бен дастарқан, тағы да басқа бұйымдардың барлығын қолмен тіккен. Бүгінде тігін ісін кәсіпке айналдырып отырғандар аз емес. Солардың бірі – Әсемгүл Ташметова.
Кәсіпкер болу Әсемгүлдің бала күнгі арманы болатын. Ол бұл мақсатына 2018 жылы “Бастау” жобасына қатысу арқылы қол жеткізді. Мемлекеттік қолдауға ие болған нәзік жан мал шаруашылығымен айналыса бастады.
Жауапкершілігі мол бұл салада аз уақыттың ішінде толағай табыстарға қол жеткізді. Мағжан Жұмабаев ауданына қарасты Бәйтерек ауылдық округінің әкімі болды. Халықтың ыстық ықыласына бөленіп, елді мекендерді көркейтуге өз үлесін қосты. Әсемгүл кәсіпкер болсам деген арманынан алыстаған жоқ.
– Мемлекеттік қызметкер бірнеше саланың тізгінін қатар ұстай алмайды. Сондықтан да мен кәсіп ашуды кейінге қалдырдым. Тігіншілікке сәби күтіміне байланысты демалысқа шаққан соң ден қойдым. Жас аналарға, балаларға арналған киімдерді, көрпелер мен төсек орындарын тіге бастадым, – дейді ол.
Тігін ісін Әсемгүл Омбы қаласындағы техникумда игерген. Ол аталмыш оқу орнынан “Жеңіл өнеркәсіптің технологы” мамандығын алып шыққан еді. Бүгіндері он саусағынан бал тамған жанның тұрақты тұтынушылары да артып келеді. Тігіншінің кәсібі пандемия кезінде кеңейе бастаған. Қол қусырып отырмауды ойлаған ол ғаламтор арқылы тапсырыстар қабылдап, өз өнімдерін әлеуметтік желілерде жарнамалаған. Тауарларына сұраныс артқан соң оқушыларға арналған мектеп формасын, спорттық киімдерді тігуді де қолға алды.
– Жаңа оқу жылы жақындаған уақытта ата-аналардан мектеп формасына тапсырыстар жиі түсіп жатады. Ал қыс мезгілінде жылы киімдер тігумен айналысамын. Әсіресе желтоқсан айында тұтынушыларымның қатары артады. Болашақта кәсібімді кеңейтіп, цех ашқым келеді. Бұл арманымның орындалатынына да сенімдімін, – дейді Әсемгүл.
Аманжол НҰРТАЗИН,
“Soltüstık Qazaqstan”.