Soltüstık Казахстан
Облыста соңғы бір аптаның ішінде 12 өрт оқиғасы тіркелді. Абырой болғанда адам өлімі тіркелмеді.
Облыстық төтенше жағдайлар департаменті баспасөз қызметінің хабарлауынша, дүйсенбі күні Петропавлдағы Ойқала шағынауданындағы Павлов, 58 мекенжайындағы баспанадан өрт шыққан. Қызыл жалын жеке тұрғын үйдің 80 шаршы метр аумағын шарпыды. Өртсөндірушілердің жылдам әрекеті арқасында бір адам құтқарылды. Тілсіз жау толығымен сағат 08.42 кезінде ауыздықталды.
Тағы бір өрт оқиғасы Ғабит Мүсірепов атындағы ауданның Нежинка ауылында тіркелді. Қаңтардың 11-і күні түнгі сағат 01.30 шамасында “101” нөміріне жеке тұрғын үйден өрт шықты деген ақпарат түсті. Баспанада 1993 жылы туған келіншек пен оның 2 жастан асқан ұлы болған. Құтқарушылар дереу отты ауыздықтап, ана мен баланы сыртқа шығарды. Түтіннен уланған адамдар аудандық ауруханаға жеткізіліп, келер күні үйге жіберілді.
Мамандардың айтуынша, қызыл жалынның кесірінен орын алған төтенше жағдайлар тұрғындардың қарапайым қауіпсіздік ережелерін сақтамауынан тіркеледі.
Аманжол НҰРТАЗИН,
“Soltüstık Qazaqstan”.