Soltüstık Казахстан
Солтүстік Қазақстан облысы бойынша қылмыстық-атқару жүйесі департаментіне қарасты түзету мекемелерінде жазасын өтеп жатқан 260 адам рақымшылыққа ілінеді. Соның 89-ы түрмеден босатылса, 171-нің жазасын өтеу мерзімі қысқартылады. Рақымшылыққа ілінгендердің қатарында 27 жастағы Анастасия Попова да бар.
Ол – Ақмола облысының тумасы. 2020 жылдың наурыз айында Степногорск қалалық сотының үкімімен Қылмыстық кодекстің 106-бабы бойынша 2 жыл және 2 айға бас бостандығынан айырылды. Жазасын Петропавлдағы ЕС164/6 түзету мекемесінде өтеді. Мұнда болған 6 ай ішінде ол тігінші, шаштараз мамандықтарын игеріп алды. Тәртібі де жақсы болғандықтан Настя рақымшылыққа ілінді.
– 2021 жылдың 7 желтоқсанында ел Тәуелсіздігінің 30 жылдығына қарсы “Рақымшылық туралы” Заң қабылданды. Осы ретте түзету мекемелерінде жазасын өтеуге 1 жылға жуық уақыт қалған және тәртіптері жақсы сотталғандар рақымшылыққа ілінеді. Анастасия Попованың ісі қайта қаралып, жазаны одан әрі өтеуден босатылсын деген үкім шығарылды, – деді Петропавл қалалық сотының судьясы Алмас Жұмағазин. Енді Анастасия сот отырысынан кейін құжаттарын ретке келтіріп, тиісті рәсімдерден өткен соң, Степногорск қаласына жол тартады. Келіншектің айтуынша, аяғын шалыс басқан оған колония қабырғасында өткен жарты жыл өмірлік сабақ болды. Енді отбасын құрып, ана атанғысы келеді.
Жалпы рақымшылыққа ардагерлер, кәмелетке толмағандар, егде жастағылар, 1-ші және 2-ші топтағы мүгедектер, қоғамға қауіп төндірмейтін адамдар ілінеді. Солтүстік Қазақстан облысы бойынша қылмыстық-атқару жүйесі департаментінің бастығы Рустан Ахметжанов қазіргі таңда 77 істі сот қарап, соның 64-інде сотталғандар босатылғанын атап өтті. Мұнымен қоса, 171 азаматтың жазасын өтеу мерзімі қысқартылады. Қазіргі таңда ел аумағында 64 түрме мен 16 тергеу изоляторы бар. Онда 34 мыңға жуық азамат жазасын өтеуде.
Майгүл СЕЙІЛБЕК.