Soltüstık Казахстан
Облыс аумағында жыл басынан 27 өрт оқиғасы тіркеліп, екі адам қаза тапты, зардап шеккендердің біреуі – бала. Облыстық төтенше жағдайлар департаментінің мәліметінше, тек өткен аптада өңірде 12 өрт тіркелген. Мәселен, Айыртау ауданындағы Янко стансасында жер үйдің мұржасын ерте жабу салдарынан улы газ ауаға тарап, екі адамға иіс тиді. Үйді жалға алып келген 24 жастағы екі тұрғын аудандық ауруханаға жеткізілді. Екеуінің де жағдайы орташа.
Ал Тайынша ауданы Многоцветное елді мекеніндегі жеке тұрғын үйде 23 қаңтар күні өрт шыққан. Кіреберіс бөлме тұтас жанып кетті. Ғимараттың шатыры жартылай құлап, қабырғалары зақымданды. Өрт сөндірушілер оқиға орнынан 48 жастағы ер адамның денесін тапты. Өрттің шығуына пешті дұрыс жақпау себеп болған.
– Жыл басталғалы өңірде 27 өрт тіркелді. Бұл өткен жылдың осы кезеңімен салыстырғанда шамамен екі есеге аз. Өрттен екі адам қаза тауып, 5 адам жарақаттанды. Күйік алғандарың ішінде бір бала бар. Көп жағдайда өрт жеке секторда тіркеледі. Оған пешті дұрыс жақпау, электр қондырғыларын қолдануда қарапайым сақтық ережелерін сақтамау себеп, – дейді облыстық төтенше жағдайлар департаменті мемлекеттік өрт бақылау басқармасының бастығы Дмитрий Растихин.
Ақерке ДӘУРЕНБЕКҚЫЗЫ,
“Soltüstık Qazaqstan”.